Aýdan ortalyǵy Jelezınka aýylynda salynǵan bul medısına mekemesi “100 mektep, 100 aýrýhana” memlekettik baǵdarlamasy boıynsha júzege asty.
Jańa ǵımarat aýdan ortalyǵyna da sán berip, jarqyrap tur. Aýdan Reseıdiń Sharlaq aýdanymen shekaralas ornalasqan. Aýrýhana úıiniń qurylysyna respýblıkalyq bıýdjet qarjysynan 911 mıllıon teńge jumsaldy. Qurylysty oblysqa tanymal “Stalmontaj” jaýapkershiligi shekteýli seriktestigi júrgizdi.
60 oryndyq aýrýhana janynda emhana da bar, ol kúnine 100 adamdy qabyldaı alady. Sonymen qatar, aýrýhanada perzenthana men jedel járdem pýnkti de jumys jasaıdy. Aýdandyq aýrýhananyń bas dárigeri Gúlbaram Ospanovanyń aıtýynsha, jańa aýrýhana osy zamanǵa saı emdeý qural-jabdyqtarymen tolyq qamtamasyz etilgen. Aýyldyqtar qala jaqqa barmaı-aq endi óz aýdan ortalyqtaryna kelip, emdelip, tekserile alady. Dıagnostıkalyq medısınalyq quraldar jetkilikti.
Oblys ortalyǵyndaǵy emdeý mekemelerinen keńester alyp turý úshin aýrýhana ortalyq telemedısına júıesine qosylǵan. Aldaǵy jyldary Astanadaǵy, Almatydaǵy ǵylymı ortalyqtarmen tikeleı baılanystarǵa shyǵý múmkindigine qol jetkizedi. Aýdan ortalyǵyndaǵy burynǵy eski aýrýhana endi qaıta jóndelip kásiptik mektepke laıyqtalsa, mektep úıi jańa balabaqshaǵa aınalady. Bul kúnderi aýdan dárigerleri densaýlyq saqtaýdyń jańa júıesi boıynsha ózderine júktelgen mindetter údesinen shyǵý úshin jumys isteýde.
Farıda BYQAI, Pavlodar oblysy.