Atbasar, Selınograd, Astrahan aýdandarynda kóktemgi sý tasqyny bolý qaýpi áli seıilgen joq. Jyl saıyn tótenshe oqıǵa oryn alyp jatatyn Atbasarǵa 15 tehnıka jóneltti. Sondaı-aq 60-qa jýyq adam da qaýipti aımaqqa attandy.
Atbasar aýdanynda sý tasqyny qaýpine daıyndyq qyzý júrgizilýde. Iаǵnı, ár apta saıyn turǵyndar men jergilikti sharýa qojalyqtary, tótenshe jaǵdaı salasynyń mamandary birlesip, Jabaı ózeni arnasyn tazartýǵa baǵyttalǵan aýqymdy jumys atqardy. Saqtyq sharalarynyń aldyn-alýǵa 48 tehnıka men 150-den astam adam jumyldyrylǵan. Sondaı-aq,12 naýryzdan bastap aýdanda 4 jedel jasaq uıymy táýlik boıy jumys istep tur. Aýdan ákimdiginde halyqtan ótinimder qabyldaıtyn shtab táýlik boıy kezekshilikte. Al oblys ortalyǵynan barǵan qosalqy kúsh aýdannyń qaýipsizdigin qamtamasyz etýge úlesterin qospaq.
–Atbasar jáne Astrahan aýdandaryna sý basýdyń aldyn-alý úshin qosymda kúsh jiberýdemiz. Bul aýdandar erekshe baqylaýda. Aldaǵy 30-31 naýryz kúnderi jáne sáýir aıynyń basynda kúnniń kúrt jylynýyna baılanysty qar erip, Jabaı ózeni arnasynan tasý qaýpi joǵary. Ázirge Atbasar aýdanynda tótenshe jaǵdaı tirkelgen joq. Saqtyq sharalaryn júrgizip jatyrmyz. Biz osyndaı qosalqy kúsh pen tehnıkany Selınograd, Arshaly, Astrahan aýdandaryna da jiberdik. Sondaı-aq, arnaıy rezervte ustap turǵan qosalqy toptar bar,–deıdi oblystyq tótenshe jaǵdaılar jónindegi departamentiniń bastyǵy Alekseı Sovetov.
Kóktemgi sý tasqynyn aldyn-alý úshin óńirde 1 myń arnaıy tehnıka daıyn tur. Ázirge aýyl-aımaqtan 1,5 mıllıon tekshe metr qar shyǵaryldy. Sondaı-aq, 93 myń dana qap pen 31 myń tonna ınertti materıal daıyndaldy.
Aqmola oblysy