Jambyl oblysynyń eriktileri koronavırýs indetiniń taralýyna baılanysty elimizde tótenshe jaǵdaı engizilgennen bastap, kún saıyn óńirdegi barlyq qala men aýdan turǵyndaryna túsindirý jumystaryn júrgizýde. Álemdi sharpyǵan indettiń aldyn alý maqsatynda áýlıeatalyq eriktiler ózderi tikken 10 myń dana medısınalyq maskalardy qala tazalyǵyna jaýapty jumysshylar men turǵyndarǵa taratty.
«Jambyldyq eriktiler osy ýaqytqa deıin 30 myń únqaǵaz, búktemeler men medısınalyq maskalar taratyp, 15 reıd uıymdastyrdy. Sonymen qatar, áleýmettik az qamtylǵan, kópbalaly jáne jalǵyzilikti qarııalarǵa «Biz birgemiz» uranymen birinshi kezektegi qajetti 700 dana azyq-túlikter men gıgıenalyq zattar salynǵan qoraptar úlestirdi», deıdi Jambyl oblystyq jastar saıasaty máseleleri basqarmasynyń basshysy Serikbol Berikqoja. Sondaı-aq, ol atalǵan basqarmanyń «Qoǵamdyq saqshy» jobasyn jyl basynan beri júzege asyryp kele jatqanyn jetkizdi. Oǵan «Jibek joly», «Aq suńqar», «Temirqazyq» volonterlik qozǵalystary men óńirdegi «Jas Otan» Jastar qanaty, «Qazaqstan stýdentter Alıansy» jáne «Jas sarbaz» áskerı-patrıottyq jastar uıymynyń eriktileri tartylǵan. Atalǵan joba aıasynda eriktiler mereke kúnderi qadaǵalaý sharalaryna atsalysyp, saıabaqtarda, kóshelerde jáne móltekaýdandarda túsindirý jumystaryn júrgizgen. Olar meıramhanalar, oıyn-saýyq ortalyqtary, kafeler men ashanalardyń saǵat 22.00-den keıin jabyq bolýyn oblystyq polısııa departamenti qyzmetkerlerimen birlese qadaǵalap, arnaıy reıdtik jumystarǵa qatysýda.
Jambyl oblysy