25 naýryzda elimizdiń basym bóliginde jaýyn-shashynsyz aýa raıy saqtalǵanymen, birqatar óńirlerde qolaısyz meteorologııalyq qubylystar kútiledi, dep habarlaıdy Egemen.kz.
«Qazgıdromet» deregine sáıkes, aýqymdy antısıklon Qazaqstan aýmaǵynyń kóp bóliginde ashyq ári qurǵaq aýa raıyn qalyptastyrady. Tek batys óńirlerde atmosferalyq fronttardyń yqpalynan jańbyr jaýyp, naızaǵaı oınaıdy.
Respýblıka boıynsha tuman túsip, soltústik pen ortalyqta kóktaıǵaq bolady. Sonymen qatar soltústikte, ońtústikte jáne ońtústik-shyǵysta jeldiń kúsheıýi boljanyp otyr.
Túrkistan oblysynyń soltústiginde shańdy daýyl kútiledi. Munda soltústik-shyǵystan soqqan jeldiń ekpini 23 m/s-qa deıin jetedi. Al Shymkentte jeldiń jyldamdyǵy 15-20 m/s shamasynda bolady.
Aqmola oblysynda kúnniń jylynýyna baılanysty qar qarqyndy erip, ózender men sý arnalarynyń deńgeıi kóterilýi yqtımal. Uqsas jaǵdaı Pavlodar oblysynda da baıqalady. Soltústik Qazaqstanda aýa temperatýrasy kúndiz 7-12°C-qa deıin kóteriledi.
Ulytaý oblysynyń soltústigi men shyǵysynda, sondaı-aq Qaraǵandy oblysynyń keı aýmaqtarynda tuman túsedi.
Atyraý oblysynda soltústik, ońtústik jáne shyǵys bólikterde jańbyr jaýyp, naızaǵaı oınaıdy. Túnde jáne tańerteń batysynda tuman túsedi. Jeldiń ekpini 15-20 m/s-qa deıin kúsheıedi.
Jetisý oblysynda soltústik-batystan soqqan jeldiń ekpini keı ýaqytta 30 m/s-tan asady, bul óńirde daýyldy jaǵdaı týyndaýy múmkin.
Sonymen qatar 25 naýryzda Aqtóbe, Almaty jáne Astana qalalarynda aýa sapasynyń nasharlaýy kútiledi. Mamandardyń túsindirýinshe, qolaısyz meteorologııalyq jaǵdaılar – tymyq aýa raıy, álsiz jel, tuman jáne ınversııa sııaqty faktorlardyń áserinen zııandy zattardyń jınalýy. Mundaı kezde eldi mekenderde aýanyń lastaný deńgeıi artýy yqtımal.
Aldaǵy eki táýlikte aýa raıy qubylmaly bolady