Elimizdiń Ekologııa, geologııa jəne tabıǵı resýrstar mınıstrligi koronavırýs pandemııasy kezinde úıde otyrǵan oqýshylardyń ýaqytyn tıimdi ótkizý maqsatynda ekologııalyq taqyrypqa arnalǵan respýblıkalyq úzdik sýret jəne qoldan jasalǵan buıymdar konkýrsyn jarııalady.
"Qazirgi qıyn kezeńde balalarymyz úıde otyrýǵa məjbúr. Biz osy sətti paıdalanyp, oqýshylar arasynda baıqaý ótkizýdi jón dep sheshtik. Konkýrs "Tabıǵat pen ekologııany saqtaý", "Janýarlar dúnıesin saqtaý", "Qoqys suryptaý" nomınasııalary boıynsha ótpek", - dep jazdy mınıstr Maǵzum Myrzaǵalıev.
Uıymdastyrýshylardyń aıtýynsha, ár nomınasııa boıynsha júldeli úsh oryn taǵaıyndalǵan. Konkýrs bastaýysh, orta jəne joǵary synyptar arasynda ótkiziledi. Mınıstr jeńimpazdardy arnaıy syılyqpen marapattaýǵa ýəde berdi.
"Sýret jəne qoldan jasalǵan buıymdardan bólek, qoqystardy bólektep jınaý taqyrybynda beınerolık túsirýge de bolady. Úzdik rolık ıelerine de baǵaly syılyq beriledi", - dedi mınıstr.
Konkýrsqa qatysýshylar óz jumystaryn 2020 jylǵy 30 səýirge deıin aty-jónin, turǵylyqty mekenin, qaıda, qandaı synypta oqıtynyn, jas mólsherin kórsete otyryp, #EsoQuarantine heshtegimen əleýmettik jelilerde jarııalaý kerek nemese EcoQuarantine@gmail.com poshtasyna joldaýy qajet.
Budan basqa, mınıstrlik eko-ambassadorlar, tabıǵatty saqtaý taqyrybynda onlaın eko-saǵattar ótkizip, oqý-tanymdyq sabaqtar júrgizedi. Bul onlaın sabaqtardyń bárin Ekologııa mınıstrliginiń saıtynan jəne əleýmettik jelilerdegi paraqshalardan kórýge bolady. «Karantın ýaqytyn balalarmen birge utymdy ótkizýge, qyzyqty əserler alýǵa, tabıǵatty aıalap, oǵan zııan keltirmeýdi úırenýge shaqyramyn", - deıdi M.Myrzaǵalıev.
Qymbat TOQTAMURAT