Naýryzdyń sońyna deıin barlyq saqtyq sharalary qatań saqtalyp, indetten aman kelgen Túrkistan oblysyn koronavırýs aınalyp ótpedi. Aıdyń sońynda Jetisaı aýdany turǵynynyń indet juqtyrǵany jarııa etildi. Al sáýirdiń alǵashqy kúni atalǵan aýdannan taǵy 4 adamnan aýrý anyqtaldy.
Indetti Jetisaıǵa «jetkizgen» azamatsha 21 naýryz kúni Nur-Sultan qalasynan Pavlodar-Qyzylorda baǵytyndaǵy poıyzben shyǵyp, Qaraǵandy qalasyna toqtaǵan. Alty saǵat vokzalda otyrǵan ol, ári qaraı Petropavl – Qyzylorda baǵytyndaǵy poıyzben Shymkent qalasyna kelgen. Sóıtip jeke kólikpen Jetisaı qalasyna jetken. Naýryzdyń 27-inen qyzýy kóterilip aýyrǵan ol aýrýhanaǵa 30 naýryzda qaralǵan. Alǵashqyda naýqaspen qarym-qatynasta bolǵan 16 adam anyqtalǵan-dy. Keıin bul san óse túsken. Naýqaspen baılanysta bolǵan adamdardy tekserý barysynda, otbasynyń 3 múshesiniń saraptamasy oń nátıje berdi.
Al COVID-19 saraptamasy oń qorytyndy bergen besinshi jaǵdaı Almaty qalasyna issaparmen baryp kelgen azamattan anyqtaldy. Túrkistan oblysy Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nurbek Nyshanov qazirgi tańda naýqastar tolyq dárigerlerdiń baqylaýyna alynǵanyn, jaǵdaılary qanaǵattanarlyq dárejede ekenin habarlady. Qarym-qatynasta bolǵan barlyq adamǵa stasıonarlyq oqshaýlaý sharalary júrgizilgen. Tıisti hattamaǵa sáıkes, emdik sharalar jasalýda.
Túrkistan oblysynyń ákimi О́mirzaq Shókeev óńirde oryn alǵan jaǵdaıǵa baılanysty turǵyndarǵa úndeý joldady. Epıdemıolog mamandar tarapynan tirkelgen aýrý oshaqtarynda zararsyzdandyrý, baılanysta bolǵandardy tabý jáne oqshaýlaý boıynsha pandemııaǵa qarsy is-sharalar uıymdastyrylǵan. Infeksııa tabylǵan Jetisaı aýdanyndaǵy Ábdihalyq aýyly men aýdan ortalyǵyndaǵy shaǵyn aýdanda karantın jarııalandy. Oblystyń ózge aýdandarynan ınfeksıonıst jáne reanımotologtardan quralǵan 6 brıgada Jetisaıǵa attanǵan. Oblystyń bas ınfeksıonıst dárigeri aýdanda osy sharalarǵa basshylyq etedi. Sondaı-aq oblys ákimi aýdan ákimine jáne tıisti organdarǵa eldi mekender shekarasyna blok-beketter qoıýdy tapsyrǵanyn málimdedi. Tótenshe jaǵdaı rejimin buzǵan azamattar zań aıasynda jaýapqa tartylatynyn eskertti.
Aıta ketelik, oblysta Covid-19 koronavırýs ınfeksııasynan qolaısyz elderden kelgen 495 adam monıtorıngtik baqylaýǵa alynǵan. Onyń 9-y 1 «a» sanatyndaǵy, al 486 adam 1 «b» sanatyndaǵy elderden kelgen.
Túrkistan oblysy