Qasym-Jomart Toqaev Iаsýtoshı Nıshımýrany Japonııa Parlamentiniń Qazaqstanmen dostyq lıgasynyń tóraǵasy bolyp taǵaıyndalýymen quttyqtady, dep habarlaıdy Egemen.kz Aqordanyń baspasóz qyzmetine silteme jasap.
Kezdesý barysynda ózara yntymaqtastyqtyń qazirgi jaı-kúıi men perspektıvasy, parlamentaralyq baılanystardy nyǵaıtý máseleleri qarastyryldy.
Prezıdent Japonııa elimizdiń Azııadaǵy negizgi ári senimdi seriktesi ekenin atap ótti.
Memleket basshysy byltyr Tokıoǵa jasaǵan resmı saparynyń nátıjesinde qol jetkizilgen ýaǵdalastyqtardyń júzege asyrylý barysyna toqtalyp, ekijaqty saýda-ekonomıkalyq jáne ınvestısııalyq yqpaldastyqty arttyrý múmkindikteri zor ekenine nazar aýdardy.
«Biz Tokıomen keńeıtilgen strategııalyq yqpaldastyqty tereńdetýge aıryqsha mán beremiz. Men byltyr Japonııaǵa resmı saparmen bardym. Onyń qorytyndysy qazaq-japon baılanystaryn jańa deńgeıge kóterdi. Sapar aıasynda qurmetti Sanae Takaıchı hanymmen ekijaqty qarym-qatynastyń barlyq baǵytyn qamtıtyn birlesken málimdemege qol qoıdyq. Sapar kezinde saýda, ǵylym jáne bilim, sıfrlandyrý, ekologııa, aýyl sharýashylyǵy salasyna qatysty 17 vedomstvoaralyq mańyzdy qujat bekitildi. Qos memlekettiń bıznes ókilderi túrli baǵytta jalpy quny 3,7 mıllıard dollar bolatyn 60-tan astam qujatqa qol qoıdy. Tokıoda «Ortalyq Azııa – Japonııa» dıalogynyń alǵashqy sammıtin tabysty ótkizdik. Bul alqaly jıyn aımaqaralyq baılanystardy kúsheıtýge septigin tıgizgeni sózsiz», dedi Qasym-Jomart Toqaev.Memleket basshysy atalǵan sammıt kelesi jyly Astanada ótetinin eske salyp, oǵan daıyndyq jumystary bastalyp ketkenin jetkizdi.
Sonymen qatar Prezıdent pen Dostyq lıgasynyń tóraǵasy mádenı-gýmanıtarlyq baılanystardy talqylady.
Qasym-Jomart Toqaev Qazaqstanda Japonııanyń mádenıeti men dástúrli sport túrlerine, ásirese sýmo jáne dzıýdo kúresterine qyzyǵýshylyq artyp kele jatqanyn aıtyp, qazaqstandyq sýmoshy Kımbozan Harýkıdiń (Ersin Baltaǵul) jetistikterine toqtaldy.
Iаsýtoshı Nıshımýra arnaıy ýaqyt taýyp júzdeskeni úshin Memleket basshysyna alǵys aıtty. Sondaı-aq Japonııa Parlamenti Qazaqstanmen kópjosparly yqpaldastyq aıasyn keńeıtýge daıyn ekenin rastady.