Astana qalasynda jyly mezgildiń kelýimen balalardyń terezeden qulaý qaýpi kúrt artyp otyr. Osyǵan baılanysty qalalyq Tótenshe jaǵdaılar departamenti Polısııa departamenti, ákimdik jáne eriktilermen birlesip «Qaýipsiz tereze» aksııasyn bastady, dep habarlaıdy Egemen.kz.
TJD málimetinshe, bıyl Astanada balalardyń terezeden qulaýyna baılanysty 5 oqıǵa tirkelgen. Onyń ekeýi ókinishke qaraı qaıǵyly jaǵdaımen aıaqtalǵan. Al ótken jyly 58 jaǵdaı tirkelip, 14 bala kóz jumǵan. Qaýiptiń qaterin seıiltý maqsatynda aksııa aıasynda qala boıynsha myńǵa jýyq tereze blokıratory ornatý josparlanǵan. Osy maqsatta mamandar eń aldymen áleýmettik osal toptaǵy jáne kópbalaly otbasylarǵa basymdyq berip, aldyn ala jasalǵan tizim boıynsha úılerdi aralady. Turǵyndardyń kelisimimen qaýipsizdik qurylǵylary tegin ornatylyp, túsindirý jumystary júrgizdi.
Astanada kópqabatty úıdiń terezesinen qulaǵan bala qaza tapty
Mamandardyń aıtýynsha, mundaı oqıǵalardyń kópshiligi balalardyń moskıt toryna súıenýinen bolady. Alaıda torlar balanyń salmaǵyn kótere almaıdy.
«Sondyqtan ata-analarǵa terezelerge arnaıy blokıratorlar ornatý, tereze mańyna jıhaz qoımaý, balalardy qaraýsyz qaldyrmaý usynylady. Qoldanylyp jatqan blokıratorlar terezeniń tolyq ashylýyna jol bermeı, tek shaǵyn sańylaý qaldyrady», dedi Astana qalasy Tótenshe jaǵdaılar departamenti tótenshe jaǵdaılardyń aldyn alý basqarmasynyń aǵa ınjeneri Álı Arǵynbaev.
Profılaktıkalyq is-shara aıasynda tótenshelikter Abaı kóshesi, 63-úı turǵyndarynyń páterine de arnaıy tereze qorǵanysh qurylǵylaryn ornatty. Astanalyq turǵyn Jupargúl Syvanova aıtýynsha, olardyń óziniń 21 nemeresi bar, onyń beseýi osy shańyraqta turady. Keshki ýaqytta taǵy eki nemeresi kelip turady. Sondyqtan balalardyń qaýipsizdigi – otbasy úshin asa mańyzdy másele.
«Buryn balalar terezege jaqyndaǵan saıyn qatty qorqyp otyratyn edik. Úıimizde nemereler kóp bolǵandyqtan olardyń qaýipsizdigi biz úshin eń mańyzdy másele. Búgin arnaıy kelip, terezege qorǵanysh qurylǵysyn ornatyp bergen mamandarǵa úlken alǵysymdy bildiremin», dedi elordalyq turǵyn Jupargúl Syvanova.
«Tereze - SAFE»: Balany terezeden qulaýdan qalaı qorǵaımyz?
Buǵan deıin balalar terezege jaqyndaǵan saıyn alańdap otyratynyn jetkizgen 8-qabattaǵy turǵyn Aıjan Musajanova da qaýipsizdik qurylǵysy ornatylǵannan keıin kóńilderi tynyshtalǵanyn jetkizdi.
«Men segizinshi qabatta turamyn. Úıde bir jasar kishkentaı balam bar, sondyqtan onyń qaýipsizdigi biz úshin eń mańyzdy másele. Tereze kez kelgen ýaqytta ashylyp ketýi múmkin, sol sebepti mundaı qorǵanys quraldarynyń ornatylýy óte qajet dep oılaımyn. Qazirgi tańda balalardyń terezeden qulap ketýine qatysty túrli jaǵdaılardy kúndelikti ınternetten kórip júrmiz. Sondyqtan osyndaı aldyn alý sharalarynyń qolǵa alynǵany óte mańyzdy», dedi Aıjan Musajanova.
Petropavlda 2 jasar bala terezeden qulap ketti
Tótenshe jaǵdaılar departamenti qaýipsizdikke baǵyttalǵan mundaı profılaktıkalyq sharalar aldaǵy ýaqytta da jalǵasatynyn málimdedi.
Nurbolat AMANBEK