Petropavl – Almaty baǵyty boıynsha ushqan áýe reısiniń 63 jastaǵy jolaýshysy qoǵamdyq tártipti buzǵany úshin jaýapkershilikke tartyldy, dep habarlaıdy Egemen.kz.
Kóliktegi polısııanyń málimetinshe, ushaq qonǵannan keıin áýe kompanııasynyń ókilderi er adamdy Almaty áýejaıyndaǵy jelilik polısııa bóliminiń qyzmetkerlerine tapsyrǵan.
Quqyq qorǵaý organdarynyń deregine sáıkes, Almaty qalasynyń turǵyny ushaq bortynda mas kúıde bolǵan, ekıpaj músheleriniń talaptaryna baǵynbaǵan, balaǵat sózder aıtyp, basqa jolaýshylarǵa qolaısyzdyq týdyrǵan.
Atyraý oblysynda buzaqylyq deregimen 121 adamǵa sot úkimi shyqty
Er adamǵa qatysty Ákimshilik quqyqbuzýshylyq týraly kodekstiń úsh baby: qoǵamdyq orynǵa mas kúıinde kelý, áýe kemesinde tártip erejelerin buzý jáne usaq buzaqylyǵy úshin ákimshilik is qozǵaldy.
Usaq buzaqylyq isi Almaty qalasynyń mamandandyrylǵan aýdanaralyq ákimshilik sotyna prosessýaldyq sheshim qabyldaý úshin joldandy.
Aıta keteıik, Astana qalasynyń prokýratýrasy jol qozǵalysy erejelerin júıeli ári óreskel buzatyn júrgizýshilerge qatysty jaýapkershiliktiń qatańdatylǵanyn málimdedi. Endi agressıvti júrgizý men qaýipti manevr jasaý tek aıyppulmen shektelmeı, «usaq buzaqylyq» retinde baǵalanyp, júrgizýshini 15 táýlikke deıin qamaýǵa alýǵa negiz bolady.