Bul týraly Densaýlyq saqtaý mınıstri Eljan Birtanov aıtty.
«Elimiz boıynsha eki qalada – Nur-Sultan men Almaty qalasyndaǵy kúndelikti ınfeksııanyń ósimi tómendep keledi. Ári qaraı da karantındik sharalar osy eki qalada kúsheıtiletin bolady.Basqa óńirlerde ósim bar. Biraq osy karantındik sharalardyń negizinde kún saıynǵy ósim bir deńgeıde. Árıne, osy Almaty men Nur-Sultan qalasynyń deńgeıine jetkizý úshin karantındik sharalardy engizý qajet. О́kinishke qaraı, Túrkistan, Qyzylorda oblystarynda tek qana qalalarda emes, aýyldyq jer, aýdandyq deńgeıde de naýqas tirkeldi», - dedi mınıstr.
Koronavırýstyń tez taralatynyna senbeıtin aýyldyq jerlerdegi halyqqa mınıstr karantın talaptaryn oryndaý keregin eskertti.
«Aýyldyq jerde turatyn keıbir azamattar senbeıdi. Koronavırýstyq ınfeksııa bizge jetpeıdi, biz ony kórmeımiz dep oılaıdy. О́kinishke qaraı, shyndyqty aıtý kerek, qazirgi tańda óte úlken qaýip osy aýyldyq jerlerde. Múmkindik bolsa, barlyq azamattar otbasylarymen birge úıde otyrýy qajet»,- dedi E. Birtanov.
Eger eki aptanyń ishinde karantın talaptaryn saqtasaq, epıdemııanyń órshý qaýpi tómendeıdi.
«Birinshi qaýip – qart adamdardyń jaǵdaıy. Olardy bólek bólimshelerge otyrǵyzyp, qosymsha tamaqtandyryp, medısınalyq kómek berip, syrtqa shyǵarmaý kerek. Sol ýaqytta qaýip deńgeıi tómendeıdi dep senemiz. Jalpy balalarǵa da, basqa azamattarǵa da múmkindik bolsa úıde otyryp, qajetsiz qarym-qatynasty toqtatý qajet. Osy eki apta shydasaq ári qaraı epıdemııanyń deńgeıi tómendep kele jatyr»,- dedi Eljan Birtanov.