Merdiger mekemeler jol tóseý kezinde olqylyqtar jiberse tapsyrys berýshi qabyldamaıdy. Bul týraly Sybaılas jemqorlyqqa qarsy is-qımyl Agenttiginiń Shymkent qalasy boıynsha departamenti men «Ulttyq jol aktıvteri sapasy ortalyǵy» RMK Shymkent qalasy boıynsha fılıaly tarapynan júrgizilgen reıd barysynda habarlady.
«Sapaly jol» jobasy aıasynda qaladaǵy A2 kóshesi men Temirlan tas joly arasyndaǵy jol aıryǵyndaǵy jol qurylystary tekserýden ótti.
Shara barysynda jol qurylysynyń talaptary qadaǵalanyp, sapasy tekserildi. Sybaılas jemqorlyqqa qarsy is-qımyl Agenttiginiń Shymkent qalasy boıynsha departamentiniń aǵa ofıseri S.Ásilbektiń aıtýynsha qaladaǵy barlyq salynyp jatqan joldar tekserýden ótedi. Olqylyqtar shyqsa tapsyrys berýshige hat joldanyp, kemshilikter joıylmaı qabyldaýǵa alynbaıdy.
Jol sapasy jyljymaly zerthanada tekseriledi. Asfaltty arnaıy apparatpen oıyp, onyń quramy men standarty saralanady. Sonymen qatar joldyń eni kólemi de nazardan tys qalmaıdy.
«2019 jyldyń qorytyndysy boıynsha Shymkenttegi jol qurylysyndaǵy qatelikterge 800-den astam eskertpe jasalǵan. Mine búgin taǵy qalalyq Sybaılas jemqorlyqqa qarsy qyzmetimen birge tekserýge shyqtyq. Nátıjesin qosymsha habarlaıtyn bolamyz» - dedi «Ulttyq jol aktıvteri sapasy ortalyǵy» RMK Shymkent qalasy boıynsha fılıalynyń ınspektory Q.Shakırov.
Aıta keteıik, jyl basynan júrgizilgen 2 reıdtik shara barysynda 27 buzýshylyq anyqtalyp, kemshilikterdi qalypqa keltirý úshin tıisti merdiger mekemelerge eskertý jasalyp, sapasyz salynǵan joldardyń qurylysy boıynsha naqty tapsyrmalar berildi.