Eńbek jáne halyqty áleýmettik qorǵaý mınıstri Birjan Nurymbetov 42 500 teńgeniń keshigý sebepterin aıtyp berdi.
«42500 teńge memlekettik bıýdjetten emes, Memlekettik saqtandyrý qorynan tólenedi. Osy qor aqsha beredi jáne taǵaıyndaıdy. Qazaqstanda búkil tólemderdi «Azamattar úshin úkimet» korporasııasy júzege asyrady, ıaǵnı azamattardyń bank esepshottaryna aýdarady. Al ótinishti qabyldap jatqan Eńbek jáne áleýmettik qorǵaý mınıstrligi barlyq derekterdi tekserip jiberedi. Osy úsh mekemeniń azamattary kúni-túni jumys istep jatyr», - dedi Birjan Nurymbetov.
Onyń aıtýynsha, járdemaqynyń kesh túsýiniń ekinshi sebebi - azamattardyń jeke derekterin durys kórsetpeýi.
«Qazirgi tańda ótinish bergender sany 5 mln-ǵa jetti. Derekterdi tekserý barysynda keıbir adamdar ózderiniń jeke sáıkestendirý nómirin (JSN) durys kórsetpeıdi. Ekinshiden, esepshottardy durys kórsetpeıdi. Jabylyp qalǵan bank esepshottaryn jiberetinder bar. 83 myńnan asa adam osyndaı qatelik jibergen», - dedi mınıstr.
Sondaı-aq keı azamattar 42500 teńgeni balalary nemese týystarynyń esepshottaryna aýdarýdy suraıdy. Mınıstr ár azamattyń jeke esepshoty bolýy tıis ekenin túsindirdi.
«Alaıaqtar sizdiń aty-jónińiz ben JSN-di kórsetip, óziniń esepshotyn tirkep, sizdiń atyńyzdan ótinish berýi múmkin. Sol kezde sizge tıesili aqshany alaıaqtardyń alyp ketetini anyq. Sondyqtan árbir adamnyń jeke esepshoty bolýy tıis», - dedi mınıstr.