Elordada birqatar kásiporyndar Nur-Sultan qalasy boıynsha kedergisiz júrip-turý úshin jalǵan anyqtamalar jasaǵan. Kásiporyn basshylary olarda jumys istemeıtin azamattarǵa anyqtama bergen. Tártipbuzýshylyq faktilerin polısııa qyzmetkerleri planshettegi elektrondy baza arqyly tekserý kezinde anyqtady. Barlyq patrýldyq qyzmetter planshettermen qamtylǵan. Tártipbuzýshylar jaýapkershilikke, tipti qylmystyq jaýapkershilikke tartylýy múmkin.
О́tken aptada qalada karantın rejımin buzǵany úshin 800-den astam azamat ákimshilik jaýapkershilikke tartyldy, onyń 32-i qamaýǵa alyndy, qalǵandaryna aıyppul salyndy. Nur-Sultan qalasy boıynsha ákimshilik polısııa bastyǵy Eljan Shópekovtiń aıtýynsha, karantın kezinde qala kóshelerinde bes myńǵa jýyq polısııa qyzmetkerleri qoǵamdyq tártipti qadaǵalaýda.
«Qala turǵyndarynyń kóbi tártipti buzyp jatqan joq, alaıda polısııany aldaýǵa tyrysatyn turǵyndarymyz da bar. Shaǵyn kásiporyn ıeleri azamattar qala ishinde kedergisiz, erkin júrip-turýy úshin jumys ornynan jalǵan anyqtamalar bergen. Olar ákimshilik, tipti qylmystyq jaýapkershilikke tartylýy múmkin», – dep atap ótti E. Shópekov.
Sońǵy aptada aıyppul turaǵyna 400-ge jýyq avtokólik jóneltilip, 500-den astam memlekettik nómir tárkilendi.
«Karantınniń birinshi kúninen bastap tártip buzǵany úshin ákimshilik jaýapkershilikke shamamen úsh myń adam tartyldy. Polısııa turǵyndardy karantın rejımin buzbaýǵa jáne qaýipsizdik sharalaryn saqtaýǵa shaqyrady. О́zińizdiń jáne jaqyndaryńyzdyń densaýlyǵyn oılańyz», - dedi Shópekov.