Elordanyń Qoǵamdyq densaýlyq saqtaý basqarmasynyń basshysy Sáýle Qısyqova 9 sáýirden beri elordada 5 myńǵa jýyq adamǵa ekspress-testileý júrgizilgenin málimdedi.
«9-13 sáýir aralyǵynda Nur-Sultan qalasynda 4 766 adamǵa koronavırýs ınfeksııasyna baılanysty ekspress testileý júrgizildi. Onyń 61 jaǵdaıynda nemese 1,2% testileý oń nátıje kórsetti. Bas memlekettik sanıtarlyq dárigerdiń qaýlysyna sáıkes, bul adamdar ári qaraıǵy tekserý jumystary úshin provızorlyq stasıonarǵa jatqyzyldy. Iаǵnı, polımerazdy-tizbekti reaksııa ádisimen koronavırýs ınfeksııasyna tekserý júrgiziledi. 61 adamnyń 30-y teris nátıjemen aýrýhanadan shyǵaryldy», dedi S. Qısyqova.
Sonymen qatar ol koronavırýs ınfeksııasynan qaıtys bolǵan naýqas týraly aıtyp berdi. Onyń aıtýynsha, 1950 jyly týǵan turǵyn 11 sáýirde jedel járdem qyzmeti arqyly provızorlyq aýrýhanaǵa aýyr halde túsken.
«Jaǵdaıy aýyr bolǵandyqtan, naýqas jedel túrde reanımasııaǵa jatqyzyldy. Týystarynyń aıtýynsha, marqum úıde 3 kún boıy aýyrǵan, dene qyzýy 38 gradýsqa deıin kóterilgen. Medısınalyq kómekke júginbeı, ózdiginen qyzýdy basatyn dáriler ishken. Entigip, tynys alý qıyndaǵan soń stasıonarǵa júgingen. Odan bólek, naýqas arterııalyq gıpertenzııa, qant dıabeti, júrek ıshemııasymen aýyrǵan. 2011 jyly oǵan aortakaranarlyq shýnttaý jasalǵan. Naýqastan koronavırýstyq ınfeksııa tabyldy, aýrýdy dıagnostıkalaý men emdeýdiń klınıkalyq hattamasyna sáıkes em-dom júrgizildi. Kásibı mamandardyń qatysýymen konsılıým ótti. Biraq qarqyndy terapııaǵa qaramastan aǵzalyq jetispeýshilik belgileri kóbeıip, 13 sáýirde saǵat 23:40-ta naýqas kóz jumdy. Júrgizilgen barlyq reanımasııalyq sharalar kómektespedi. Týystary arasynan jaqyn baılanysta bolǵan adamdar tekserilip, úı jaǵdaıynda karantınge ornalasty», dedi S.Qısyqova.
Qazirgi ýaqytta elordada vırýs juqtyrǵandar sany 264 adamǵa jetti. Sońǵy eki kúnde 12-13 sáýir kúnderi 29 jaǵdaı tirkelgen.
«19 jaǵdaı – ókpeniń ekijaqty qabynýy, tynys alý qıyndyǵy boıynsha birneshe kúnnen beri stasıonarda jatqan naýqastardan tabyldy. Olardyń alǵashqy synamasynda koronavırýs ınfeksııasy tabylmaǵan edi. Biraq KVI dıagnostıkalaý men emdeý hattamasynda aýrý belgileri (rentgenogrammada nemese kompıýterlik tomografııada ókpeniń ekijaqty ózgeriske ushyraýy) baıqalǵan adamdardan qaıta synama alý usynylǵan. Osylaısha, dárigerler qaıta synama alǵan 19 naýqastan ınfeksııa tabyldy. Bul ádis arqyly koronavırýs ınfeksııasyn dıagnostıkalaý men emdeý tıimdi bolady. Taǵy 7 oqıǵa – naýqastarmen baılanysta bolǵandar, otbasy músheleri nemese birge jumys istegender arasynan tabyldy. Olar buǵan deıin oqshaýlanyp, tekserýden ótken jáne ınfeksııa rastalǵandyqtan, aýrýhanaǵa jatqyzyldy. Al 3 oqıǵa – koronavırýs ınfeksııasy boıynsha júrgizilgen monıtorıng barysynda tabyldy», dedi Sáýle Qısyqova.
Jıyn barysynda ol elordada karantınge jabylǵan 23 nysannyń 13-i ashylatynyn málimdedi.
«Tutas epıdemııalyq kezeńde elordada 23 nysan karantınge jabyldy. Bul nysandarda epıdemııaǵa qarsy barlyq shekteý sharalary júrgizildi. Qazirgi ýaqytta karantın rejiminde 10 nysan qaldy. Aýrýdyń 267 oshaǵynda dezınfeksııalyq sharalar júrgizilgen. Bul – naýqastar turǵan úıler men jumys oryndary. Nur-Sultan qalasy boıynsha jalpy 17 414 jaǵdaıǵa zerthanalyq tekserý jumystary júrgizildi», dedi basqarma basshysy.