Tótenshe jaǵdaı kezinde tabysynan aıyrylǵandarǵa tólenetin 42500 teńge kólemindegi áleýmettik kómek alýǵa qatysty saýaldar áli de tolastamaı otyr.
Jedel jelige habarlasatyndardyń kópshiligi tirkelý tártibimen qatar, nelikten bul kómekti almaı otyrǵandyǵy týraly da surap bilýde. Búginde tótenshe jaǵdaı saldarynan tabysynan aıyrylǵan aqmolalyqtarǵa 3 mıllıard teńge kóleminde áleýmettik kómek kórsetildi.
– Sońǵy kúnderi 42500 teńge alý boıynsha jumys jandanýda. Onyń alǵashqy merzimi 15-shi sáýir kúni aıaqtaldy. Qazir ótinishterdi qabyldaý júıesi birshama ońtaılandyryldy. Aqmola oblysy boıynsha búginde 75 myń azamatqa áleýmettik kómek kórsetildi,–deıdi oblystyq jumyspen qamtý jáne áleýmettik baǵdarlamalardy úılestirý basqarmasynyń bólim jetekshisi Nurgúl Beksultanova.
Shynymen de, ótinim bergen aqmolalyqtardyń birqatary jeke sáıkestendirý nómirin, endi biri esepshottaryn qate jiberip, aqsha aýdarýǵa qıyndyq týǵyzyp otyr.
Bólim jetekshisi Nurgúl Beksultanovanyń aıtýyna qaraǵanda, júıe boıynsha qate jiberý múmkin emes. Sondyqtan, ótinimder ár túrli sebepter boıynsha qanaǵattandyrylmaı otyr. Keıbiri óz qatelikteri saldarynan tólemdi ala almaı otyrsa, endi biri qate málimetter berýde eken.
Járdemaqy qolyna tıgen jurtshylyq memlekettiń qamqorlyǵyna dán razy.