Jaýapty ári saýapty qyzmet bolǵan soń adamdardyń amandyǵy úshin barymyzdy salamyz. Azamattyq arymyz synǵa túsken osynaý qıyn-qystaý sátte bir úıdiń balasyndaı, bir qoldyń salasyndaı jurt bolyp jumylyp eńbek etýdemiz. Qanshama qalalar karantınge jabylyp, saqtyq sharalary kúsheıtildi.
Árıne onyń bári azamattardyń amandyǵy úshin jasalyp jatqan sharapatty sharalar ekenin eskerýimiz kerek. Men 1-toptaǵy qaýiptiligi joǵary medısına qyzmetkerleriniń qataryndamyn. Biz alty saǵattan kezek boıynsha jumys isteýdemiz. Kezegimiz aıaqtalǵanda jataqhanaǵa alyp ketedi.
Osy oraıda qaýipti indetpen bilek túrip kúresip jatqan medısına qyzmetkerleriniń mańdaı ter mashaqaty men eńbegin eskerip, batyldyǵyn baǵalap, tólemaqy berýge sheshim qabyldaǵan Prezıdent Qasym-Jomart Kemelulyna alǵys bildirgim keledi. Osy berilgen memlekettik tólemaqy medısına salasynda indetpen kúresip júrgen qyzmetkerlerdiń jigerin janyp, jumystaryna ynta syılaıtynyna senimdimin.
Ǵalııa HAÝEZHANQYZY,
Soltústik Qazaqstan oblystyq №1 qalalyq aýrýhanasy Juqpaly aýrýlar bóliminiń meńgerýshisi