Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qısyqova elordadaǵy koronavırýs juqtyrǵan naýqastardyń qazirgi densaýlyq jaǵdaıy jaıynda aıtty.
«Nur-Sultan qalasynda osyǵan deıin vırýsty juqtyrǵan jalpy 319 adam anyqtaldy. Onyń 47 paıyzy erler, 53 paıyzy áıelder. Koronavırýsty juqtyrǵandardyń 43 paıyzy – 30-49 jas aralyǵyndaǵy azamattar. 26 paıyzy 18-29 jasqa deıingiler, 16,5 paıyzy – 50-59 jas aralyǵyndaǵy adamdar bolsa, 9 paıyzy 60-69 jas aralyǵyndaǵy azamattar. 3 paıyzy – 70 jáne odan úlken jastaǵy kisiler. 3,4 paıyzy – 18-ge tolmaǵan balalar», dedi Sáýle Qısyqova.
Onyń aıtýynsha, qazir 9 naýqastyń jaǵdaıy aýyr halde.
«Jalpy elordada emdelip shyqqandardyń sany – 154 adam. Atalǵan azamattar úı jaǵdaıyndaǵy karantınde taǵy 14 kún boıy bolýy tıis. Sonymen qatar búgin aýrýhanadan bir shetel azamaty jazylyp shyqty. Atalǵan azamat Ystambul-Nur-Sultan reısinen túsirilgen bolatyn. Qazirgi ýaqytta aýrýhanalarda 399 naýqas em alýda. Onyń 170-i koronavırýstan emdelýshiler. Onyń ishinde 10 naýqas – basqa oblystardyń turǵyndary. Sonymen qatar 9 naýqastyń jaǵdaıy aýyr halde. Onyń tórteýi jasandy tynys alý apparatyna qosylǵan. Bekitilgen hattamaǵa sáıkes tıisti em júrgizilip jatyr. Basqa naýqastardyń jaǵdaıy qalypty», dedi ol.