Birlik – mamyr aıy enshisindegi ǵana sóz emes, kúndelikti oıymyzda, áreketimizde turýǵa tıis uǵym. Ol – otbasyn, áýletti, ujymdy, dalany, qalany, ulysty, tutas elderdi de yntymaqty etetin qundylyq.
Memleket basshysy Qasym-Jomart Toqaev 10 aqpandaǵy Úkimettiń keńeıtilgen jıynynda: «Biz bárimiz bir el bolyp yrys-yntymaǵymyzdy, bereke-birligimizdi saqtaı otyryp, evolıýsııalyq, ıaǵnı tabıǵı jolmen damyp kelemiz. Bul óte mańyzdy. Budan basqa jol joq» dep, jańa Ata zań jobasyna qatysty kózqarasyn, keń talqylaýdyń mańyzyn, halyqtyq referendýmnyń jaýapty sát ekenin jetkizip, atqarýshy bılik aldyna qadaý-qadaý mindetter qoıdy. Sonyń ishinde ónimdilikti arttyrý, tehnologııalyq jańarý, adam kaptıtalyn damytý, ınvestısııa saıasatyn júıelep, bıznes múddesin turaqty qorǵaý, ekonomıkalyq derbestikti nyǵaıta túsý, syn-qaterler tusynda ınflıasııa kórsetkishin ornyqty retteý, memleket qarjysynyń teńgerilimin qamtamasyz etý, ekonomıkanyń eksportqa baǵdarlanǵan sektorlaryn qalyptastyrý, elimizdi jahandyq sıfrlyq ekonomıkaǵa kiriktirý basty talap ekeni naqty aıtyldy.
Baıyptaı qarasaq, memleketimiz saıası jańaryp, reformalyq ózgerister kezeń-kezeńmen júzege asyp jatqan shaqta osy basymdyqtar halyqtyń birligi arqasynda ǵana oryndalady. Búgingi eldik istiń ıdeologııalyq temirqazyǵy – ádilettilik, qundylyǵy – táýelsizdikke qorǵan zań men tártipten jasampazdyq pen jańashyldyqqa deıingi myzǵymas uǵymdar. Eńbek, bilim, ǵylym, mádenıet, kásibılik osynyń ishinde. Báriniń asyl arqaýy – birlik.
Qazirgi ishki saıasat ta, syrtqy saıasat ta elshil, jasampaz, bilikti tulǵalardan salamatty, salmaqty, sarabdal is pen sheshimdi kútedi. Alash kósemi Álıhan Bókeıhan: «Saıasat isi birlikpen ornyna barady», depti. Bul «oryn» izgilik pen ıgilik, yjdaǵat pen yntymaq ekeni túsinikti.
Sondyqtan respýblıkalyq referendýmǵa usynylǵan jańa Konstıtýsııa jobasyn – elimizdiń ótkenin, búginin, erteńin teń salmaqtaǵan, óz ishimizdegi, óńirdegi, álemdegi qaýip-qaterdi eskergen negizgi qujat dep qabyldaımyz. Birtýar Álekeń: «Qazaqty aq jolǵa salamyn deseń, istiń astaryn qarastyr, istiń syrty – jaýǵa bel kórsetkendik», dep jazady. Sol sebepti kópti tolǵandyrǵan shetin máselelerdi ulttyń sany men sapasy birte-birte sheshetinine senimimiz kámil. Ásirese sapa men bilik!
Júıeli jańarý kezeńinde biz halqymyzdyń ishki jáne syrtqy syn-qaterge tótep bere alýyna, ıgi úderisterge barynsha beıimdelýine múddelimiz. Buǵan qoǵamdy izgilendirip, elshil hám jaýapty azamattardyń qataryn kóbeıtip, túrli mártebedegi ınstıtýttardy sapalandyryp qana qol jetkize alamyz. Osy jolda da birlikke zárýmiz. Ult ustazy Ahmet Baıtursynulynyń: «Basqadan kem bolmas úshin biz bilimdi, baı hám kúshti bolýymyz kerek. Bilimdi bolýǵa oqý kerek. Baı bolýǵa kásip kerek. Kúshti bolýǵa birlik kerek. Osy kerekterdiń jolynda jumys isteý kerek» degen danalyǵyn umytpaýǵa tıispiz.
Ras, múdde birligi artqan saıyn el qýatty. Biz Otanymyzdaǵy oń ózgeristerdi álemdik geosaıası, geoekonomıka-lyq, tehnologııalyq jańarýlardyń jalǵasy dep qabyldaımyz. Jurt bolǵan soń qıly pikir, kózqaras aıtylary anyq. Tipti keıde órkenıetti degen eldiń jurtshylyǵy da jaza basyp jatady. Mysaly, AES máselesinde Germanııa jaǵdaıyn alaıyq. Bilikti mamandary «Bul bizge kerek, bas tartpaıyq» dese de, basym kópshiligi oǵan qarsy shyqty. Taıaýda osy eldiń kansleri Frıdrıh Mers «GFR-dyń atom energııasynan bas tartýy strategııalyq qatelik edi» dep málimdedi. Batys aıasynda dál osyndaı pikirdi buǵan deıin Eýropalyq komıssııa tóraǵasy Ýrsýla fon der Lıaıen de aıtqany belgili. Mine, osy jaıtty saraptaı kele, Qazaqstannyń AES týraly teń ustanymy jáne máseleniń referendýmǵa shyǵarylyp, qoldaý tapqany qaı jaǵynan da durys sheshim bolǵany qýantady.
Biz ult zııalylar paıymyn eske túsirgende, barshaǵa ustaz Abaıdyń danalyǵyn aınalyp óte almaımyz. Uly aqyn: «Birlik – aqylǵa birlik, malǵa birlik emes» deıdi. «Aqylǵa birliktiń» astarynda – adamshylyqqa, eldikke, parasatqa den qoıý men uıysý tur. Oıshyl leksıkonyndaǵy «malǵa birlik» – qulqyn men paıdakúnemdik múddesi. Ádiletti Qazaqstan jańa Ata zań jobasy kirispesinde «memlekettilikti nyǵaıtý», «Uly dalanyń myńdaǵan jyldyq tarıhynyń sabaqtastyǵyn saqtaý», «keleshek urpaq aldyndaǵy asa joǵary jaýapkershilik» mindetin aıqyndaǵanda, aqylǵa birlikti basshylyqqa alǵany aqıqat.
12 aqpan kúni «Egemen Qazaqstan» gazetinde arnaıy komıssııa talqylaýynan ótken Konstıtýsııa jobasy men Memleket basshysynyń respýblıkalyq referendým ótkizý týraly Jarlyǵy jarııalana sala, eldik is-sharany túsindirý maqsatynda qurylǵan Jalpyulttyq koalısııa mańyzdy jumysyna kiristi. О́ńir-óńirdegi, jer-jerdegi, mekeme-uıymdardaǵy túrli alańda jurtshylyqpen ashyq kezdesýler ótkizdi. Qalyń áleýmettiń nıeti, ańsary, pikiri durys baǵdarda ekenine kózimiz jetti. О́ıtkeni elshil azamattar konstıtýsııalyq reformanyń ózegi – memlekettilik pen táýelsizdikti nyǵaıtý, halyqtyń ál-aýqatyn kóterý, ornyqty damýdy negizdeý ekenin túsindi.
Budan dáıekti ádilettilik ustanymy qoǵamnyń aqylǵa birligin bekemdeıtinine sendik.