Almaty qalasyndaǵy Medeý aýdanynyń jaratylystaný-matematıka baǵytyndaǵy Nazarbaev zııatkerlik mektebiniń oqýshylary AQSh-ta ótken halyqaralyq robottehnıka týrnıriniń absolıýtti chempıony atandy.
«Western Edge Premier Event» – AQSh-ta ótetin halyqaralyq «FIRST» robottehnıka qozǵalysynyń eń bedeldi jarystarynyń biri. Bul týrnırge álemniń túkpir-túkpirinen úzdik komandalar qatysady. Olar robot qurastyrý, baǵdarlamalaý, ınjenerlik sheshimder jáne komandalyq jumys boıynsha baq synaıdy. Atalǵan jarystyń ereksheligi – komandalar tek robottyń tehnıkalyq múmkindigin ǵana emes, ınnovasııalyq sheshimderin, qoǵamǵa paıdasyn jáne komandanyń jumysyn da kórsetedi.
Los-Andjeleste ótken týrnırge 10-nan astam elden 88 komanda qatysty. Elimizdiń namysyn qorǵaǵan «PHOBOS» komandasy birinshi oryndy qanjyǵasyna baılady. Sonymen qatar komanda týrnırdiń «Inspire Award Winner – Sea Division Inspire Award Winner», «Western Edge Premier Event Winning Alliance Captain», «Sea Division Winning Alliance Captain», «Western Edge Premier Event PHOBOS» sııaqty tórt birdeı marapatyna qol jetkizdi.
Aıta keteıik, «PHOBOS» komandasymen birge el namysyn Almaty qalasynyń «Qazaq Style» jáne «UlyDala» komandalary da qorǵady. Sondaı-aq Aqtóbe qalasynyń «GAMBIT» komandasy ozyq ınjenerlik sheshimderi men tehnıkalyq qujattamasynyń joǵary deńgeıi úshin «Think Awar 2nd Place» marapatyna ıe boldy.
Taǵy bir mańyzdy jańalyq NIS Shymkent-Abaı mektebiniń oqýshylary Kentýkkı shtatynyń Leksıngton qalasynda ótken «Run for the Robots» halyqaralyq týrnırinde joǵary nátıje kórsetti. Mekteptiń «Atomic Heart» komandasy qazylar alqasynyń eń joǵary marapaty – «Inspire Award» júldesin aldy. Tartysty dodaǵa AQSh-tyń 25 shtatynan jáne Pýerto-Rıko, Brazılııa, Qazaqstannan 70-ten astam komanda qatysty.
Farıza IZBASAROVA,
L.N.Gýmılev atyndaǵy
Eýrazııa ulttyq ýnıversıtetiniń 2-kýrs stýdenti