«Derekterdi óńdeý ortalyqtary alqabyn» (DО́OA) salý josparlanǵan ýchaske qorshalyp, qazirgi ýaqytta aýmaqty josparlaý men jerdi qazý jumystary júrgizilip jatyr. Jalpy alǵanda, qurylysty tolyǵymen 2033 jylǵa qaraı aıaqtaý kózdelip otyr.
О́ńirlik ákimdiktiń dereginshe, joba kezeń-kezeńimen iske asyrylady. 2027 jyldyń alǵashqy jartysynyń sońyna deıin qajetti ınjenerlik ınfraqurylymdy tartý jáne qýattylyǵy 125 MVt bolatyn alǵashqy derekterdi óńdeý ortalyǵyn salý josparlanǵan. 2029–2033 jyldar aralyǵynda kelesi nysandar kezeń-kezeńimen paıdalanýǵa beriledi. Barlyq kezeń aıaqtalǵannan keıin klasterdiń jalpy qýaty 1 GVt-qa jetip, onyń aýmaǵynda zamanaýı 10-ǵa deıin derekterdi óńdeý ortalyǵy ornalasady.
– Joba Memleket basshysy Qasym-Jomart Toqaevtyń tapsyrmasymen júzege asyrylyp jatyr. Osy arqyly álemdik jetekshi gıperskeılerlerdiń qatysýymen Eýrazııa keńistigindegi eń iri sıfrlyq klasterlerdiń birin qurý kózdelip otyr. Jobany júzege asyrý úshin 177 gektar jer telimi bólindi. Onyń ishinde 124,4 gektar alǵashqy kezeńdegi nysandardy salýǵa arnalǵan. Sonymen qatar MAES-1 stansasy aýmaǵynda sıfrlyq klasterdi odan ári keńeıtý maqsatynda jalpy kólemi shamamen 1300 gektar bolatyn qosymsha jer ýchaskeleri rezervke qoıyldy, – dep málimdedi ákimdikten.
Q.Sátbaev atyndaǵy kanaldan sý alý núktesi anyqtalyp, sýmen jabdyqtaý nysandarynyń jobalaý jumystary júrgizilip jatyr. Keshenniń sharýashylyq-turmystyq qajettilikteri úshin táýliktik sý tutyný kólemi 2300 tekshe metrdi quraıdy. Sondaı-aq órt qaýipsizdigin qamtamasyz etý úshin de qajetti sý kólemi qarastyrylǵan.
Jobanyń alǵashqy kezeńin elektrmen jabdyqtaý úshin qýattylyǵy 215 MVt bolatyn qoldanystaǵy qosalqy stansa paıdalanylady. Bul salynyp jatqan derekterdi óńdeý ortalyǵynyń qajettilikterin tolyq qamtamasyz etýge múmkindik beredi.
Qazirgi ýaqytta alańda daıyndyq jumystary bastalǵan. Aýmaqty josparlaý, jer jumystary júrgizilýde jáne qorshaý ornatyldy.
– «Derekterdi óńdeý ortalyqtary alqabyn» qurý elimizdiń sıfrlyq ekonomıkasyn damytýdaǵy mańyzdy qadam bolady. Joba halyq-
aralyq deńgeıdegi zamanaýı sıfrlyq ınfraqurylymdy qalyptastyrýǵa, iri tehnologııalyq seriktesterdi tartýǵa, elimizdiń sıfrlyq hab retindegi pozısııasyn nyǵaıtýǵa múmkindik beredi. Bizdiń mindetimiz – barlyq qajetti ınfraqurylymdy ýaqytyly daıyndap, týyndaıtyn máselelerdi jedel sheshý, – dep atap ótti Pavlodar oblysynyń ákimi Asaıyn Baıhanov.
Jobany iske asyrý kezeńinde 1500-den astam ýaqytsha jumys orny jáne nysandar paıdalanýǵa berilgennen keıin 250-den astam turaqty jumys orny ashylady dep kútilip otyr. Nysan eldegi sıfrlyq ekonomıkasyn damytý men óńirge joǵary tehnologııalyq ınvestısııalar tartýdyń negizgi draıverleriniń birine aınalmaq.
Pavlodar oblysy,
Ekibastuz qalasy