Túrkistan qalasynda 512 otbasy, ıaǵnı 3 myńnan astam adam baspanaly boldy. Qaladaǵy «Jibek joly» turǵyn úı kesheninde Memlekettik rámizder kúni qonystoıyn toılaǵan otbasylardyń qatarynda áleýmettik osal topqa jatatyn azamattar, kópbalaly otbasylar bar.
Túrkistandyqtardyń qýany-shyn bólisýge barǵan oblys ákimi Nuralhan Kósherov turǵyn úı kezeginde turǵan azamattarǵa jańa páter kiltterin tabys etip, izgi tilegin jetkizdi.
«Qazaq halqy «Úıi bardyń – kúıi bar» deıdi. Rasynda, baspana – ár otbasynyń baqyty men berekesiniń, turaqtylyǵy men tynyshtyǵynyń negizi. Memleket basshysy Q.Toqaev halyqtyń ál-aýqatyn arttyrý men turǵyndardy baspanamen qamtamasyz etýdi únemi basty mindet retinde belgileıdi. Osy mindetterdi júıeli júzege asyrýdyń nátıjesinde óńirimizde turǵyn úı qurylysy qarqyndy damyp, myńdaǵan azamattyń turǵyn úı máselesi sheshimin taýyp jatyr. Byltyr turǵyn úı kezeginde turǵan azamattarǵa 3 564 páter berilse, osy jyly 2 292 páter berýdi josparlap otyrmyz. Búgin taǵy da 512 otbasynyń qýanyshy eselendi. Bul úılerdiń jaıly ári kórikti bolýy turǵyndardyń ózderine baılanysty. Sondyqtan barshańyzdy aýlanyń tazalyǵyn saqtaýǵa, kógaldandyrý, abattandyrý jumystaryna belsendi atsalysýǵa shaqyramyn. О́ıtkeni dál osy aýlada óz balalaryńyz ósip, tárbıelenip, alańsyz oınaıdy», dedi Nuralhan Oralbaıuly.
Byltyr mamyrda kúshine engen turǵyn úı zańnamasyndaǵy ózgeristerge sáıkes, turǵyn úıge muqtaj azamattardy esepke alý, kezektiligin júrgizý, turǵyn úılerdi bólý fýnksııalary «Otbasy bank» AQ-ǵa berildi. Túrkistanda baspana kiltin alǵan turǵyndar – jańa tártippen «Otbasy bank» arqyly iriktelip, joldama alǵan alǵashqy azamattar.
Sondaı-aq bul kúni Sozaq aýdany ortalyǵyndaǵy Jetkinshek shaǵyn aýdanynda 29 otbasyna jańa páterlerdiń kilti saltanatty túrde tabys etildi. Jańa baspanalar halyqtyń áleýmettik osal toptaryna jatatyn azamattar men kópbalaly otbasylarǵa berildi. Is-sharada aýdan ákimi Muhıt Turysbekov jańa páter ıelerin quttyqtap, bul baǵyttaǵy jumystar aldaǵy kezeńde de jalǵasatynyn atap ótti. Baspana ıeleri memleket tarapynan kórsetilip jatqan qoldaýǵa rızashylyqtaryn bildirip, qýanyshtaryn jınalǵan jurtshylyqpen bólisti.
Búginde Jetkinshekte turǵyn úı qurylysy qarqyndy jalǵasyp jatyr. Qazirde paıdalanýǵa daıyn taǵy 47 páter bar. Qujattandyrý rásimderi aıaqtalǵan soń bul baspanalar da kezeń-kezeńimen óz ıelerine tabystalady. Sonymen qatar 20 páterli turǵyn úılerdiń qurylysy júrgizilip keledi. Budan bólek, «Qazatomónerkásip» UAK»AQ-tyń enshiles uıymdarynyń demeýshiligimen jańǵyrtý baǵdarlamasy aıasynda 16 páterli eki qabatty turǵyn úıdiń qurylysy júrip jatyr.
Túrkistan oblysy