Belgili jýrnalıst Qambar Ahmettiń «Egemen Qazaqstan» gazetiniń 22 mamyr kúngi sanynda jaryq kórgen «Qajytqan 45 shaqyrym nemese Álıhan Bókeıhan aýylyndaǵy joldyń jyry» atty ótkir maqalasy halyqtyń muńyn muńdap, bılik pen buqara arasyna altyn kópir boldy.
Kópten beri túıtkildiń túıini tarqatylmaı, Shabanbaı bı aýyly jurtshylyǵynyń basty máselesine aınalǵan 45 shaqyrymdyq tozyǵy jetken joldyń jyry endi oń baǵytqa buryldy. Basylym betinde kóterilgen bul ózekti másele tıisti oryndar tarapynan jedel nazarǵa alynyp, nátıjesin berip keledi.
Aýdan ákimi Abylaı Amanjolov aýyl turǵyndarymen arnaıy kezdesip, kópten kútken qýanyshty jańalyqty jetkizdi. Kezdesý barysynda ákim jol azabyn tartqan jurtshylyqtyń talap-tilegi aıaqsyz qalmaıtynyn qadap aıtyp, jol qurylysy osy jyldyń ishinde respýblıkalyq bıýdjet qarajaty esebinen bastalatynyn málimdedi.
Bul jańalyqty estigen aýyldyń belsendi turǵyny Teńdik Raıymhanuly bastaǵan jergilikti jurtshylyq qýanyshqa kenelip, el gazetine jáne jýrnalıst Qambar Jumaǵalıulyna, sondaı-aq máselege nazar aýdaryp, oń sheshim shyǵarǵan aýdan ákimdigine shynaıy rızashylyqtaryn bildirdi.
Alash kósemi Álıhan Bókeıhannyń máńgilik mekeni – Taldybeıit qorymy ornalasqan bul tarıhı óńir úshin joldyń jóndelýi strategııalyq turǵydan óte mańyzdy. Jyldar boıy sarsańǵa salǵan joldyń jańarýy aýyl halqynyń qatynasyn jaqsartyp qana qoımaı, qazaq tarıhynyń altyn dińgegi sanalatyn kıeli mekenge aǵylatyn týrıster aǵynyn eseleı túspek.
Infraqurylymnyń retke kelýi osy aımaqtyń týrıstik áleýetin ashyp, saıahatshylar úshin qolaıly orta qalyptastyrýǵa úlken serpin beredi.
Osylaısha, «Egemen Qazaqstan» gazetiniń synı maqalasynan keıin seń qozǵalyp, Shabanbaı bı aýylyndaǵy jol máselesiniń oń sheshilýi tórtinshi bılik pen jergilikti atqarýshy organdardyń birlesken nátıjeli jumysynyń aıqyn úlgisine aınalǵaly otyr.
Qaraǵandy oblysy