Almaty qalasynyń tolyqtaı karantınge jabylýy megapolıspen shektesetin oblys aýdandarynyń turǵyndaryna birshama ábiger ákelgeni ras. Ásirese qaladaǵy emhanalarda tirkeýde turatyndar men aýrýhanalarda em qabyldap júrgen naýqastar úshin qıyndyq týa bastaǵan edi.
О́ıtkeni oblystyń ońtústik óńirindegi 7 aýdannyń turǵyndaryna sapaly qyzmet kórsetetin oblystyq kópsalaly aýrýhana da megapolıste ornalasqan bolatyn. Biraq oblystyq densaýlyq saqtaý basqarmasy jedel sheshim qabyldap, qala mańyndaǵy aýdan turǵyndaryna medısınalyq kómek kórsetýdiń jańa baǵytyn usynypty.
– Almaty qalasyna kirip-shyǵý toqtatylǵannan bastap oblys turǵyndaryna medısınalyq kómek kórsetýdiń jańa erejesin jasadyq. Bul boıynsha qala mańyndaǵy aýdandardyń turǵyndary endi oblystaǵy kez kelgen emhana, aýrýhanalarǵa kedergisiz tirkelip, qajet mamanǵa baryp qarala alady. Birinshi kezekte júkti áıelderdi jedel, qaıta tirkeýge alamyz. Naýqas bolsa, aýmaqtaǵy tańdaǵan aýrýhanaǵa jatqyzyp, emin jalǵastyrýǵa múmkindik jasadyq. Al Almatymen shekaralas aýdandardan qalaǵa qatynap em qabyldaıtyn naýqastar úshin arnaıy jedel járdem kóligin shyǵardyq. Mysalǵa, aýdandardan kópsalaly aýrýhanaǵa ózderi baryp gemodıalız jasatatyn naýqastar bar. Olar sozylmaly búırek jetispeýshiligi dıagnozy boıynsha emdelip júrgender. Qazir bul naýqastardy aýdandyq aýrýhanadan Almatydaǵy kópsalaly klınıkalyq aýrýhanaǵa jedel járdem kóligimen tasymaldaýǵa kóshtik. Bul adamdardyń qaýipsizdigi úshin jasalǵan shara ári indettiń taralmaýyna kepil bolady, – deıdi oblystyq densaýlyq saqtaý basqarmasynyń basshysy Baýyrjan Ysqaq.
Sondaı-aq Almaty qalasy mańyndaǵy Qarasaı, Ile, Talǵar aýdandarynyń aýmaǵyna qoıylǵan blok-beketter men sanıtarlyq tekserý oryndarynda oblys dárigerleri táýlik boıyna kezekshilik etýde. Ár medısınalyq tekserý pýnktinde bir mezette úsh medısına qyzmetkeri jumys isteıdi eken. Olar teplovızor, medısınalyq maska jáne arnaıy kostıýmdermen tolyq qamtamasyz etilgen. Densaýlyq saqtaý basqarmasy blok-bekettegi kezekshilik atqaratyn quqyq qorǵaý organdarynyń qyzmetkerleri men ákimshilik qyzmetkerlerin medısınalyq maskamen qamtýdy da uıymdastyryp otyr.
Maska demekshi, oblys aýmaǵynda juqpaly indetpen kúres sharalary kúshine endi. Talapqa saı endi adamdardyń kóshede, jumys oryndarynda medısınalyq maska taǵyp júrýi mindetteldi. Bul tártip qoǵamdyq kólik pen jeke kóliktegi jolaýshylarǵa da ortaq. Al bul jaǵdaıda betperdege degen suranys artatyny anyq. Qazirdiń ózinde oblys aýmaǵynda maska tapshylyǵy baıqalýda.
Árıne oblystaǵy óndiris oryndary medısınalyq maska óndirip jatyr. Barlyq aýdandarda eriktelerdiń bastamasymen betperde tigý isi qolǵa alynyp, turǵyndarǵa tegin taratylýda. Ákimdiktiń yntalandyrýymen jeke adamdar kóp retti tutynýǵa bolatyn maska tigip, tıimdi baǵamen satýdy jolǵa qoıǵan. Tegin taratylatyn maska sany da artyp keledi. Mundaı kómek birinshi kezekte áleýmettik jaǵynan qorǵalmaǵan otbasy músheleri men atqarýshy qyzmette júrgen mamandarǵa kórsetilip jatyr. Mysaly, tek bir ǵana Qaratal aýdanynyń ózinde shaǵyn bıznes ókilderi, bilim mekemeleri men eriktiler óz kúshterimen táýligine 3 myńdaı kóp ret paıdalanatyn maska tikti. Bul jumys Ile aýdanynda da jolǵa qoıylǵan, onda bir táýlikte 20 myń maska daıyndalýda. Al Taldyqorǵanda jekemenshik dárihananyń basshysy 5 myń maskany halyqqa tegin taratqan.
Jaqynda oblys basshysy Amandyq Batalov maska tigýge shaǵyn bıznes nysandaryna memlekettik tapsyrys berý jaǵyn oılastyrýdy qarastyryp, jeke gıgıenalyq quraldarmen turǵyndardy jetkilikti mólsherde qamtamasyz etý máselesin odan ári shıratýdy tapsyrǵan bolatyn. Almaty oblysynda táýligine ázirge 136 myń maska shyǵarylýda.
Medısınalyq maska óndirisin jolǵa qoıǵan kásiporynyń biri Ile aýdanyndaǵy Dolce farm kompanııasy. Seriktestik táýligine 70 myń dana betperde daıyndap, shyǵarýda. О́ńirdegi medısına mekemelerin betperdemen qamtyp otyrǵan kásiporyn qaıyrymdylyq jasaýǵa da belsene kiristi. Almaty oblysynyń aýmaǵynda juqpaly indetpen kúres sharalary kúsheıgeli beri Dolce farm bir ǵana Talǵar aýdanyna 17 myń dana betperdeni tegin beripti.
– Oblysta maska tapshylyǵyn boldyrmaý úshin qoldan kelgenniń barlyǵyn jasap jatyrmyz. Sonyń ishinde Dolce farm seriktestiginiń óndirisi toqtaýsyz jumys istep tur. Táýligine 75 myń danaǵa deıin betperde shyǵarýǵa qýaty jetedi. Kúni keshege deıin 159 myń dana medısınalyq maskany qabyldap aldyq, – deıdi oblystyq kásipkerlik jáne ındýstrıaldy-ınnovasıalyq damý basqarmasynyń basshysy Rýslan Qojasbaev.
Almaty oblysy