Búgin «Qazmedıa ortalyǵy» AQ ǵımaratynda Prezıdent janyndaǵy Ortalyq kommýnıkasııalar qyzmeti bazasynda «Qazaqstan 2050» – qalyptasqan memlekettiń jańa saıası baǵyty» Strategııasynyń júzege asyrylý barysy jaıynda aqparat taratatyn jańa portaldyń tanystyrylymy boldy.
Jıyndy Prezıdent janyndaǵy Ortalyq kommýnıkasııalar qyzmetiniń resmı ókili Altaı Ábıbýllaev ashty. Al mańyzdy jobanyń iske asyrylýyn «Qazkontent» AQ basqarma tóraǵasynyń orynbasary Zarına Baqtıeva túsindirip berdi. Onyń sózinen málim bolǵanyndaı, «Qazkontent» AQ jedel aqparattar men eksklıýzıvti taldamalardyń derekkózine aınalatyn, paıdalanýshylardyń yńǵaıyna oraı barlyq zamanaýı múmkindikterdi qamtyǵan jańa ınteraktıvti portaldy iske qosyp otyr.
Munda kún saıyn 40-tan astam aqparattyq jáne taldaý materıaldary, beıne, fotomaterıaldar úsh tilde jaryq kórip otyrady eken.
Portaldyń kórý qabileti nashar jandarǵa arnalǵan arnaıy nusqasy da bar. Sondaı-aq, munda Qazaqstannyń ınteraktıvti kartasy ornalasqan jáne elimiz oblystaryndaǵy jobalar týraly da málimet ala alasyz.
Mádenıet jáne aqparat vıse-mınıstri Arman Qyryqbaev, Parlament Senatynyń depýtaty Serik Nógerbekov, Bilim jáne ǵylym vıse-mınıstri Murat Ábenov jańa veb-portaldyń ashylýymen quttyqtap, onyń mańyzy men múmkindikteri jaıly óz oılaryn ortaǵa saldy.
Aıdar О́risbaev.