Búgin Atyraý qalasynda ózge mektepterden artyqshylyǵy basym jańa bilim ordasy –«Nazarbaev Zııatkerlik mektebiniń» ashylý saltanaty ótti. «Nazarbaev Zııatkerlik mektepteri» derbes bilim berý uıymynyń basqarma tóraıymy Kúlásh Shámshıdenovanyń málimdeýinshe, bul elimizdegi on besinshi bolýymen erekshelenedi. Bir atap óterligi, Atyraýdaǵy erekshe mektepte AQSh, Ulybrıtanııa, Rýmynııa, Irlandııa elderi men Ońtústik Afrıka Respýblıkasynyń joǵary sanatty muǵalimderi de bilim berýge shaqyrylǵan. Al óz elimizden osy mektepte dáris berý úshin 74 úzdik muǵalim tańdalǵan.
Mekteptiń alǵashqy qońyraýy soǵylýyna arnalǵan saltanatta oqýshylarǵa oblys ákiminiń birinshi orynbasary Ǵumar Dúısembaev ta sáttilik tiledi. Konkýrstyq irikteýden joǵary ball jınaǵan 30 oqýshyǵa úzdik tósbelgi tapsyryldy. Nazarbaev Zııatkerlik mektebiniń dırektory Tabılıa Akımovanyń aıtýynsha, 7, 8, 9 jáne 11 synyptarǵa 697 oqýshy qabyldanypty. Sonymen birge, 120 oqýshyǵa arnalǵan jataqhana da paıdalanýǵa berildi. Mekteptiń synyptary osy zamanǵy ozyq tehnologııalarmen tolyq qamtylǵan. Sonyń ishinde 650 noýtbýk pen ınteraktıvti taqtalar bar. Bul hımııa-bıologııa baǵytyndaǵy mektep bolǵandyqtan, nanotehnologııa jáne bıotehnologııa kabınetteri de ashylyp otyr. Robot tehnıkasy kabıneti de oqýshylardyń qyzyǵýshylyǵyn týdyrady, deıdi mektep dırektory Tabılıa Akımova.
Joldasbek Shópeǵul,
Atyraý oblysy.