Premer-Mınıstr Asqar Mamınniń tóraǵalyǵymen ótken Úkimettiń selektorlyq otyrysynda 2020-2025 jyldarǵa arnalǵan «Nurly jol» memlekettik baǵdarlamasyn júzege asyrý máseleleri qaraldy. Bul týraly Premer-Mınıstrdiń baspasóz qyzmeti habarlady.
Indýstrııa jáne ınfraqurylymdyq damý mınıstri Beıbit Atamqulov, Shyǵys Qazaqstan oblysynyń ákimi Danıal Ahmetov, Qaraǵandy oblysynyń ákimi Jeńis Qasymbek, Atyraý oblysynyń ákimi Mahambet Dosmuhambetov jáne t.b. baıandama jasady.
2020-2025 jyldarǵa arnalǵan «Nurly jol» memlekettik baǵdarlamasy aıasynda respýblıkalyq mańyzy bar avtojoldardyń 100%-yn (21 myń shaqyrym joldy salý, rekonstrýksııalaý jáne jóndeý), oblystyq jáne aýdandyq mańyzy bar avtojoldardyń 95%-yn (27 myń shaqyrymyn jóndeý) jaqsy jáne qanaǵattanarlyq jaǵdaıǵa keltirý josparlanǵan. 112 ınfraqurylymdyq joba iske asyrylady, 550 myń turaqty jáne ýaqytsha jumys orny qurylady.
Premer-Mınıstr bıyl jalpy uzyndyǵy 4 myń shaqyrym bolatyn respýblıkalyq avtojoldardy salý jáne rekonstrýksııalaý jumystaryna 200 myńnan astam qazaqstandyq tartylatynyn atap ótti. Taldyqorǵan – О́skemen, Qaraǵandy – Balqash – Qapshaǵaı, Qalbataý – Maıqapshaǵaı, Merke – Býrylbaıtal, Úsharal – Dostyq, Aqtóbe – Astrahan, Uzynaǵash – Otar, Petropavl – Reseı shekarasy, Qostanaı – Denısovka sııaqty ýchaskelerde 2,6 myń shaqyrym jolda qozǵalys ashylady.
«Bıyl paıdalanýǵa beriletin respýblıkalyq mańyzdaǵy joldar kólemi ótken jylǵy kórsetkishpen salystyrǵanda 4 ese artyq. Jergilikti mańyzy bar joldar boıynsha bıyl 3,5 myń shaqyrym jol jóndeýden ótkiziledi. Qazaqstan tarıhynda buryn-sońdy mundaı aýqymda jumys júrgizilgen joq, sondyqtan bizdiń mindetimiz – olardy tolyǵymen oryndaý. Barlyq kúshti jumyldyrý qajet», - dedi A. Mamın.
Úkimet basshysy Indýstrııa jáne ınfraqurylymdyq damý mınıstrligine ákimdiktermen jáne «QazAvtoJol» UK» AQ-men birlesip, osy jyly josparlanǵan kólemniń ýaqytyly paıdalanýǵa berilýin qamtamasyz etýdi, rekonstrýksııalanǵan 5,7 myń shaqyrym ýchaskelerde (Qapshaǵaı – Taldyqorǵan, Qyzylorda – Shymkent – Taraz, Nur-Sultan – Pavlodar jáne t. b.) avtomobıl joldarynda tólem júıesin engizý jumysyn aıaqtaýdy tapsyrdy.
«Qurylys maýsymyn múmkindiginshe tıimdi paıdalaný qajet. Jekelegen eldi mekenderde karantın rejımine baılanysty engizilgen shekteýler jaǵdaıynda nysandarǵa janar-jaǵarmaı, jol-qurylys materıaldary men tehnıkasyn esh kedergisiz jetkizý úshin “jasyl dáliz” jumysyn qamtamasyz etý qajet», — dep A. Mamın, otandyq qurylys ındýstrııasynyń qolda bar múmkindikterin barynsha paıdalanýdy tapsyrdy.
Premer-Mınıstr elimizdiń tranzıttik áleýetin barynsha paıdalanýdyń jáne onyń artýyna barlyq kólik túrleriniń (avto- jáne temir jol kóligimen konteınerlerdi tasymaldaý, áýe júk tasymaldary), sondaı-aq barlyq negizgi operatorlardyń - QTJ, QazAvtoJol, Qazaeronavıgasııanyń yqpal etýiniń mańyzdylyǵyn atap ótti.
«Indýstrııa jáne ınfraqurylymdyq damý mınıstrligine tranzıttik aǵymdy qoldaý jáne yntalandyrý úshin qajetti sharalardy qolǵa alýdy tapsyramyn», — dedi A. Mamın.
Úkimet basshysy bıyl memlekettik baǵdarlamada qarastyrylǵan Shymkent áýejaıynyń jolaýshylar termınalynyń jáne Túrkistandaǵy halyqaralyq áýejaıdyń qurylysyn aıaqtaýdy, sondaı-aq О́skemen, Úsharal jáne Úrjar áýejaılaryn rekonstrýksııalaý jumysyn bastaýdy tapsyrdy.
«Temir jol kóligi salasynda vagon parkin jańartý jáne magıstraldyq temir jol jelisiniń tozýyn tómendetý boıynsha, sondaı-aq sý kóligi salasynda keme qatynasy shlıýzderine kúrdeli jóndeý júrgizý boıynsha jańǵyrtý jumystaryn jalǵastyrý qajet», — dedi A. Mamın.
Úkimet basshysy bıyl «Nurly jol» aıasynda iske asyrý josparlanǵan barlyq is-sharalar belgilengen merzimde aıaqtalýy tıis ekenin aıtty.