Búgingi Jambyl oblysynda «Jolbarysqamal» deıtin jer eki birdeı aýdannyń aýmaǵynda kezdesedi. Jýaly aýdany, Qoshqarata aýylynyń mańynda «Úshqaspa» deıtin jer bar. Biletinder, bul jerdiń erteden osylaı atalatynyn aıtady. Bul Boraldaı men Uzynbulaqtyń qosylǵan jerindegi alap.
El aýzynda Jolbarys hannyń kezinde osy alapty jaılaǵany jıi aıtylady. Sondyqtan da kópshilik bul ataýdyń keıinnen ózgerip, «Jolbarysqamal» atanyp ketken degen baılamǵa toqtaıdy. Iаǵnı, kópshilik bul jer Jolbarys hannyń ordasy bolǵan degen boljamdy durys kóredi. Al Jolbarys han bul jerge qalaı, ne sebepti keldi degen saýalǵa kelsek, kóptegen derekte jaýgershilik zamanda ol Tóle bımen birge kelip, osy alqapty jaılaǵan degen derekterdi kezdestiremiz.
«Jolbarysqamal» degen jer Talas aýdanynda da bar. Bul qamal Talastyń Sarysý aýdanyna qaraı barar jolyndaǵy Eseıhan aýylynyń mańynda ornalasqan. Eseıhan turǵyndary kúni keshege deıin aýyl mańynda jolbarystardyń bolǵanyn aıtady. El aýzyndaǵy ańyz boıynsha, erte zamanda Talastaǵy elge ataqty Eskendir Zulqarnaıyn soǵys salyp kelipti desedi. Jergilikti jurtshylyq jaýǵa qarsy ses kórsetip, tabandylyq tanytady. Bir sózben aıtqanda, áıgili qolbasshynyń eldi alýy qıynǵa soǵypty. Sonda Zulqarnaıynnyń keńesshileri «Bul eldiń taýynda eki qyzyl jolbarys bar. Solardy ustasaq boldy, ózderin baǵyndyrý ońaı. Olardyń ıesi – sol jolbarystar eken», depti. Sóıtip áp-sátte Eskendir Zulqarnaıyn álgi jolbarystardy ustaýǵa jarlyq beripti. Biraq Qarataýdyń qatpar-qatpar qupııalarynan jolbarystardy ustaý múmkin bolmaıdy. Biraq talaı ýaqyt arpalyssa da bul áreketten eshteńe shyqpaıdy. Aqyry bul sharýanyń bolmaıtynyna kózi jetken Zulqarnaıyn keri qaıtady. Jolbarystar sol qamalǵan jerinde qala beripti. Árıne bul ańyz. Ǵasyrlar boıy el aýzynda saqtalǵan jádiger. Alaıda kúni búginge deıin jergilikti halyq bul jerdiń «Jolbarysqamal» atalyp ketkenin osy ańyzben baılanystyrady. Sol sııaqty bul jerdiń Jolbarys hannyń ordasy bolǵan, bolmasa ańshylar azýly ańdardy qamap ustaıtyn jeri bolǵan degen de boljamdar jeterlik.
Jambyl oblysy