Qala kúni qarsańynda Almatydaǵy balalarǵa arnalǵan jedel járdem ortalyǵy respýblıkada teńdesi joq zamanaýı úlgide salynǵan dúnıejúzilik standartqa saı jańa ǵımaratqa kóshti.
Qala kúni qarsańynda Almatydaǵy balalarǵa arnalǵan jedel járdem ortalyǵy respýblıkada teńdesi joq zamanaýı úlgide salynǵan dúnıejúzilik standartqa saı jańa ǵımaratqa kóshti.
Onda negizinen qalanyń balalaryna travmatologııa, kópsalaly hırýrgııalyq kómek kórsetilýmen qatar, búgingi zaman talabyna saı jansaqtaý jáne ıntensıvti terapııa, sondaı-aq, 3 operasııalyq blok ornalasqan. Onyń qurylysyna 600 mln., sońǵy úlgidegi medısınalyq qurylǵylarmen jaraqtandyrýǵa 600 mln. teńgeden astam qarjy jumsalypty.
– Almaty qalasynda balalardyń densaýlyǵyn saqtaýda kóptegen sharalar atqarylýda. Búgingi ashylyp otyrǵan ortalyq sonyń bir parasy, – dedi saltanatty jıynda Almaty qalasy ákiminiń orynbasary Záýresh Amanjolova. – Aıta ketý kerek, qurylys jumystaryn biraz sozyńqyrap aldyq. Onyń sebebi, hırýrgııalyq korpýs bolǵandyqtan, erekshe kózqaras, erekshe talapty qajet etedi.
Záýresh Jumanáliqyzy osy ýaqytqa deıin tar jerde qysylyp-qymtyryla júrip balalardyń ómirine arasha turǵan dárigerlerdiń eńbegin atap óte kele, emdeý ornynyń búgingi zaman talabyna saı bolýy, jaǵdaıdyń jaqsarýy – ol, eń aldymen, balalarǵa jasalǵan qamqorlyq ekenine, ekinshiden, kúndiz-túni qoldarynan qandaýyr túspeıtin hırýrgterge jasalǵan qoldaý ekenine ári tek Almaty qalasy úshin emes, búkil respýblıkada mańyzy zor ekenine toqtala ketti.
Shynynda, bul ortalyq pedıatrııa qyzmetiniń, onyń ishinde balalar hırýrgııasynyń ustahanasy bolyp sanalady. Osy ortalyqta jarty ǵasyrǵa jýyq balalar hırýrgııasynyń atasy, akademık Kamal Ormantaev aǵamyz eńbek etip, qanshama býyn balalar hırýrgterin daıyndady. Jıynǵa qatysýshylar ortalyqtyń saltanatty ashylýy barshalarynyń súıikti dárigeri, otandyq medısınaǵa, onyń ishinde balalar hırýrgııasyna ólsheýsiz úles qosqan akademık Kamal Ormantaevtyń týǵan kúnimen sáıkes kelýi tegin emestigin atap ótse, Almaty qalasy ákimdigi aqsaqalymyzǵa qurmet kórsetip, ıyǵyna shapan japty.
– Osydan 15 jyl buryn Prezıdent Ákimshiligine baryp, aýrýhana aýmaǵyndaǵy bos jerge 150 oryndyq qosymsha ǵımarat salý kerektigin aıtyp ótinish bildirgen edim, – dep qýanyshymen bólisti Kamal Sárýaruly. – «Eshten kesh jaqsy» degen, árkimde bala, nemere bar. Ásirese, analar shyryldaǵan balalaryn qushaqtap kelip, kúndiz-túni aýrýhana jaǵalap júrgende júregiń aýyryp, qolymyzdan kelgen kómegimizdi aıamaımyz. Onyń ústine osy aýrýhana 1965 jyly ashylǵanda assısent bolyp kelsem, endi akademık dárejesine deıin jettim. Kóptegen bas dárigerler qolynan kelgeninshe eńbek etti. Balalar aýrýynyń jańa týǵan náresteden bastap ereksheligi óte kóp. Sondyqtan, munda san emes, sapaǵa jumys isteýimiz kerek. MRT, angıograf, t.b. apparattar alynypty, bul degen keremet qoı.
100 tósek-orynǵa eseptelip salynǵan emdeý orny jańa týǵan náresteden bastap 15 jasqa deıingi jasósirimderge medısınalyq qyzmet kórsetedi. Kez kelgen hırýrgtiń armany bolatyndaı 3 operasııalyq blok sońǵy medısınalyq tehnıkalar men qazirgi zamanǵy tehnologııalarmen jaraqtanǵan. Jeke narkoz bólmesi, neırohırýrgııalyq ota jasaıtyn mıkroskop, endovıeohırýrgııalyq jáne neırohırýrgııalyq baǵanalar, ota kezinde zertteýge arnalǵan rentgen qondyrǵysy, t.b. ornatylǵan. Ásirese, otadan keıingi jansaqtaý bólimindegi palatalar keń, jaryq. Onda naýqas balaǵa barlyq jaǵdaı jasalǵan. Shala týǵan, salmaǵy kem balalar jatatyn besikter (kıýbez) bar.
Ortalyq joǵary dárejeli mamandarmen tolyq qamtylǵan. Onda dárigerlik 28 baǵyttaǵy mamandar medısınalyq kómek kórsetse, olardyń 6-ýy medısına ǵylymdarynyń kandıdaty, 51-i joǵary jáne birinshi sanattaǵy dáriger. Eń bastysy, munda Almaty memlekettik dárigerlerdiń bilimin jetildirý ınstıtýty men S.Asfendııarov atyndaǵy Qazaq UMÝ-ynyń balalar hırýrgııasy kafedralarynyń bazasy ornalasqan. Aýrýhananyń basty ereksheligi – táýlik boıy naýqas balaǵa jedel ári sapaly kómek kórsetedi.
Gúlzeınep SÁDIRQYZY,
«Egemen Qazaqstan».
Almaty.