Qońyr kúzde totydaıyn taranyp, suńqardaıyn sylanyp turǵyndaryna erekshe kóńil-kúı, ásem án, shat-shadyman dýman syılaıtyn kúngeıdegi bas shahar – Almatynyń óz tól merekesi – qala kúni jyl saıyn úlken mahabbatpen atalyp ótiledi. Bıyl da solaı boldy. Biraq, «Bul án burynǵy ánnen ózgerek» demekshi, bıylǵy dástúrli mereke tipten erekshe jaǵdaıda toılanyp, erekshe tartýlar jasaldy.
Qońyr kúzde totydaıyn taranyp, suńqardaıyn sylanyp turǵyndaryna erekshe kóńil-kúı, ásem án, shat-shadyman dýman syılaıtyn kúngeıdegi bas shahar – Almatynyń óz tól merekesi – qala kúni jyl saıyn úlken mahabbatpen atalyp ótiledi. Bıyl da solaı boldy. Biraq, «Bul án burynǵy ánnen ózgerek» demekshi, bıylǵy dástúrli mereke tipten erekshe jaǵdaıda toılanyp, erekshe tartýlar jasaldy.
Árıne, bul aıtýly kúnge shahar bıligi erterek qamdandy. Bir aı boıy qala jurtshylyǵy arý Almatyny ánge bólep, jyrǵa qosyp, tipti qylqalam sheberleri óz sýretterin arnady. «Art bat Fest» óner festıvali tórtinshi ret shymyldyǵyn túrip, sharada otandyq, sondaı-aq, Fransııa, Italııa, Germanııa, Shvesııa, Reseı syndy elderden kelgen qylqalam sheberleriniń, sýretshilerdiń týyndylary kórermen nazaryna usynyldy. «Almaty – ińkárim meniń» retro festıvalinde shetelden kelgen juldyzdardyń ónerin tamashalaýǵa múmkindik týdy.
Qala turǵyndary men qonaqtary Almaty týraly jańa ánderdi tek «Almatym – júregimde» baıqaýynda tyńdaı aldy. Dýmandy kesh 13 qyrkúıek kúni keshkisin Respýblıka saraıynyń aldyndaǵy Abaı alańynda ótti. Án dodasynda 13 oryndaýshy baqtaryn synady. Bıyl besinshi ret ótkizilip otyrǵan án festıvalinde qala ákimi Ahmetjan Esimov sóz sóılep, baıqaýdyń joǵary deńgeıde ótkenin, qazylar alqasy men baıqaýǵa qatysýshylardyń barlyǵy – kreatıvti jastar ekenin, «eger menen qaı án sizge qatty unady dese, barlyǵy der edim» – dep, ónerli jastarǵa shyǵarmashylyq tabys tilep, Gran-prıdi jeńip alǵan Aıkúmis Bólegenge avtokóliktiń kiltin tapsyrdy. Birinshi oryndy Dıana Sharapova, 2-oryndy Saltanat Bakaeva, 3-oryndy Anel Arınova ıelendi.
Qala kúnine arnalǵan eń aýqymdy sharalar demalys kúnderi ótti. Senbi kúni «Tuńǵysh prezıdent saıabaǵynda» «Eppl Fest» alma festıvali ótip, bul sharada sharýa qojalyqtary 50 tonnadan asa ónimderin usyndy. Sondaı-aq, ekinshi halyqaralyq sırk festıvali uıymdastyrylyp, oǵan álemniń 20 qalasynan kelgen ártister qatysty. Shara 22-shi qyrkúıekke deıin jalǵaspaq. Al merekeniń basty tartýy – «Astana» alańynda buryn-sońdy bolmaǵan «Ańyz» mýltımedıalyq jáne pırotehnıkalyq shoý – 3D formatty Mapping Show jaryq festıvali edi. Saǵat keshki segizden bastap Almaty aspany san túrli túske kómkerilip, qala ajaryn asha tústi.
– Merekelik ǵalamat otshashýdy uıymdastyrý úshin Gollandııa men Bolgarııadan mamandardy shaqyrdyq, – dedi bul sharany uıymdastyrýshy Andreı Sızıkov. – Anımasııalyq shoýdy kórsetý úshin 5 myńnan asa pırotehnıkalyq otshashý qoldanylyp, Almaty kógin órnekteý sharasy eki saǵatqa sozyldy.
Almaty – táýelsizdiktiń besigi, egemendigimizdiń býynyn bekitken qala. Almaty – elimizdiń iri óndiristik jáne qarjy ortalyǵy, ónerdiń tóri. Almaty – iri ǵylym, mádenıet jáne bilim ortalyǵy. Almatynyń tabıǵat sulýlyǵyna tamsanbaıtyndar kemde kem. Elimizge aıryqsha aıbar beretin, maqtan tutatyn basty qundylyqtar da osy arý qalada ornalasqan. Qazirgi tańda qalada 2 mıllıonǵa jýyq halyq turady, kún saıyn 175 myń oqýshy mektepke baryp, 230 myńnan astam stýdent joǵary oqý oryndarynda bilim alady. Sońǵy jyldary megapolıs turǵyndary men qala qonaqtarynyń sporttyq sharaǵa, salamatty ómir súrýde belsendilikteri arta túsýde. Oǵan dálel, qala kúnine arnalǵan velojúgirýge Almatyda 4000-nan astam adam qatysýy.
– Velojúgirýde búgingideı adamdar buryn-sońdy bolǵan emes. Bul almatylyqtardyń salamatty ómir saltyna shyndap den qoıǵandyǵyn bildiredi, – dedi jeńimpazdarǵa eskertkish syılyqtar tabys etken qala ákimi Ahmetjan Esimov.
Al, keshkisin dúbirli dýman Ortalyq stadıonda jalǵasty. Munda otandyq estrada juldyzdary – «EMA 2013» mýzykalyq baıqaýynyń jeńimpazdaryna arnaıy músinsheler tabystaldy.
Gúlzeınep SÁDIRQYZY,
«Egemen Qazaqstan».
Sýretti túsirgen
Bersinbek SÁRSENOV.