Jambyl oblystyq ákimdiginde sybaılas jemqorlyqqa qarsy is-qımyl jónindegi komıssııanyń otyrysy ótip, ótken jyly jáne aǵymdaǵy jyldyń alǵashqy úsh aıynda atqarylǵan jumystardyń qorytyndysy saralandy.
«2019 jyly Jambyl oblysy boıynsha sybaılas jemqorlyq qylmystary úshin 33 laýazymdy tulǵa sottalsa, olardyń basym bóligi bilim salasyna qatysty. Basqa salalardan da sybaılas jemqorlyqqa qarsy zańnamany buzýshylar bar. Eń kóp qylmys Taraz qalasynda, Shý, Baızaq, Jýaly jáne Merki aýdandarynda oryn alǵan», dep atap ótti oblys ákimi Berdibek Saparbaev.
Jıynda elimizdiń sybaılas jemqorlyqqa qarsy is-qımyl Agenttigi oblystyq departamentiniń basshysy Ádilhan Áshirbaev baıandama jasady. Ol eńbek jáne sybaılas jemqorlyq zańnamasynyń oryndalýy boıynsha monıtorıng barysynda qyzyqty faktiler anyqtalǵandyǵyn alǵa tartty. Mysaly, sybaılas jemqorlyq áreketteri faktileri boıynsha jaýapkershilikke tartylǵan memlekettik organdar men kásiporyndardyń 9 laýazymdy tulǵalary óz basshylyq qyzmetterin jalǵastyryp kelgen. Tek sybaılas jemqorlyqqa qarsy qyzmettiń aralasýynan keıin ǵana olar óz ókilettigin toqtatýǵa májbúr bolǵan. Sybaılas jemqorlyqtyń aldyn alý jáne oǵan qarsy turý maqsatynda Sybaılas jemqorlyqqa qarsy is-qımyl Agenttiginiń tapsyrmasy boıynsha «Ashyq bıýdjettiń ınteraktıvti kartasy», «Bıznesti jáne ınvestısııalardy qorǵaý» sııaqty jobalar iske asyrylýda eken. Qazirgi ýaqytta jergilikti atqarýshy organdardyń basqarmalary men bólimderine qarasty 900 uıym óz bıýdjetteri týraly jarııalaǵan. «О́tken jyldyń qorytyndysy boıynsha departament sybaılas jemqorlyq jasaǵan 70 isti sotqa joldasa, 90 laýazymdy tulǵa qylmystyq jaýapkershilikke tartylǵan. Sybaılas jemqorlyq qylmystarynan keltirilgen shyǵyn kólemi 1,2 mıllıard teńgeni qurap, 930 mıllıon memleketke qaıtaryldy. Shaǵyn jáne orta bıznes qyzmetine aralasýmen, sondaı-aq memlekettik baǵdarlamalardy iske asyrýǵa bólingen qarajatty jymqyrýǵa qatysty qylmystardyń sany artqan», dep atap ótti Ádilhan Áshirbaev.
Anyqtalǵandaı, memlekettik qurylymdar arasynda jergilikti atqarýshy organdar sybaılas jemqorlyqqa asa beıim. Ásirese, bilim berý, densaýlyq saqtaý, áleýmettik qorǵaý, aýyl sharýashylyǵy, qurylys, energetıka jáne turǵyn úı-kommýnaldyq sharýashylyǵy salalarynda zańbuzýshylyqqa jol berilýde. Sonymen qatar, jıynda quqyq qorǵaý organdarynyń qyzmetkerlerine qarsy ótken jyly 29 qylmystyq is qozǵalǵandyǵy da aıtyldy. Aǵymdaǵy jyldyń 3 aıynda sotqa joldanǵan sybaılas jemqorlyq sıpatyndaǵy qylmystyq isterdiń sany 27-ge jetse, osy bólik boıynsha 28 tulǵa qylmystyq jaýapkershilikke tartylǵan. Baıandamashy oblys kóleminde sybaılas jemqorlyqqa qarsy is-qımyl jónindegi 2020 jylǵa arnalǵan keshendi jospardy iske asyrýǵa baılanysty birqatar usynystaryn ortaǵa saldy. Ol jergilikti atqarýshy organdardyń mańyzdy mindeti «Halyq únine qulaq asatyn memleket» tujyrymdamasyn iske asyrý sheńberinde halyqpen tıimdi keri baılanys ornatý bolyp tabylatyndyǵyna aıryqsha kóńil bóldi. Sońǵy ýaqytta «Adaldyq alańy» jobalyq keńsesiniń jumysynda oń tájirıbe jınaqtalǵandyǵy, osy baǵyttaǵy jumystardy odan ári jalǵastyrý kerektigi aıtyldy. Basqosýda «Jambyl – adaldyq alańy» jobalyq keńsesiniń jumysy men perspektıvalyq baǵyttary týraly atalǵan jobanyń jetekshisi Nazıma Jývandykova baıandady.
Jıyndy qorytyndylaı kele Berdibek Saparbaev aǵymdaǵy jyldyń birinshi toqsanyndaǵy sybaılas jemqorlyq kórinisteriniń sebepterin egjeı-tegjeıli taldaý jáne naqty is-qımyl baǵdarlamasyn ázirleý qajettigin atap ótti. Sybaılas jemqorlyqqa qarsy kúreste júıeli, keshendi sharalar qajettigin eskertti. Ákimniń aıtýynsha, bul iste óz qaramaǵyndaǵy qyzmetkerlerdiń sybaılas jemqorlyq quqyqbuzýshylyqtary úshin memlekettik organdardyń birinshi basshylarynyń otstavkasy boıynsha túzetýler engizilgen zańnama aıryqsha negizge alynýy tıis. Jergilikti atqarýshy organdardyń halyq úshin ashyq jáne qoljetimdi bolýǵa mindetti ekeni de aıtyldy. Osyǵan baılanysty, barlyq aýdandyq ákimdikterge 1 shildege deıin Taraz qalasy, Merki jáne Talas aýdandarynyń ákimdikteri sııaqty servıstik rejımge kóshý tapsyryldy.
Jambyl oblysy