Shymkent qalasynda Naýryz merekesi aıasynda uıymdastyrylǵan «DamDastour» halyqaralyq gastronomııalyq festıvali óz máresine jetip, megapolıstiń mádenı ómirindegi aıtýly oqıǵalardyń birine aınaldy. Qala ortalyǵyndaǵy Ál-Farabı alańy birneshe kún boıy álemniń túrli elderiniń ashanasy toǵysqan biregeı halyqaralyq gastronomııalyq keńistik qyzmetin atqardy, dep habarlaıdy Egemen.kz.
Festıvaldiń basty ereksheligi – onyń halyqaralyq formatta ótýi. Is-sharaǵa álemniń ár túkpirinen kelgen tanymal aspazdar qatysyp, óz elderiniń ulttyq taǵamdaryn usynyp qana qoımaı, kásibı tájirıbelerimen bólisti. Atap aıtqanda, Belgııa, Shveısarııa, Fransııa, Túrkııa, Grýzııa, Ázerbaıjan, Reseı, Qyrǵyzstan jáne О́zbekstannan kelgen halyqaralyq baıqaýlardyń jeńimpazdary kórermen nazaryna avtorlyq mázirlerin usyndy. Bul festıvaldiń mártebesin arttyryp, ony kásibı gastronomııalyq dıalog alańyna aınaldyrdy.
Festıval aıasynda ótken baıqaýlar joǵary deńgeıdegi básekemen erekshelendi. Qatysýshylar ulttyq dástúrlerdi saqtaı otyryp, zamanaýı aspazdyq tehnologııalardy sheber ushtastyra bildi. Qazylar alqasynyń sheshimimen «Eń jaqsy palaý» atalymy Grand Golden Hills meıramhanasyna, «Eń dámdi samsa» nomınasııasy Qazaq Samsa meıramhanasyna berildi. Al «Eń úzdik ulttyq taǵam» atalymynda «Pontos» meıramhanasy jeńimpaz atandy. «Kamal ata» kafesi belsendi qatysqany úshin arnaıy marapatqa ıe boldy.
Halyqaralyq mazmun jergilikti restoratorlardyń belsendiligimen úılesim tapty. Festıvalge qaladaǵy 50-ge jýyq meıramhana qatysyp, kelýshilerge ulttyq jáne álemdik ashananyń keń tańdaýyn usyndy. Qonaqtar qazaqtyń dástúrli taǵamdarynan bastap, eýropalyq jáne azııalyq as mázirlerin tamashalap, dám tatý múmkindigine ıe boldy. Sonymen qatar, Naýryz merekesiniń basty taǵamy – naýryz kójeniń birneshe túri usynylyp, merekelik dastarhannyń ajaryn asha tústi.
«DamDastour»: Sheteldik aspazdar Shymkent turǵyndaryna erekshe dám usynady
Is-sharanyń halyqaralyq sıpaty mádenı baǵdarlamadan da aıqyn kórinis tapty. Bir sahnada túrli mádenı baǵyttar men zamanaýı trendter toǵysyp, street style jáne K-pop bı saıystary, ulttyq dombyra óneri, batyrlar shoýy, sırk qoıylymdary kórermenderge usynyldy. Sonymen qatar, motosherý men avtoshoý, qolónershiler jármeńkesi jáne arnaıy taqyryptyq aımaqtar festıval mazmunyn baıytyp, ony kópqyrly mádenı alańǵa aınaldyrdy.
Osylaısha, «DamDastour» halyqaralyq gastronomııalyq festıvali Shymkent qalasynyń halyqaralyq deńgeıdegi mádenı jáne gastronomııalyq ortalyq retindegi áleýetin aıqyn kórsetti. Túrli halyqtardyń ashanasy men dástúrin toǵystyrǵan bul aýqymdy shara Naýryz meıramynyń rýhyn zamanaýı formatta jańǵyrtyp, qala ómirindegi mańyzdy ári jarqyn oqıǵalardyń biri retinde joǵary baǵalandy.
Shymkentte Naýryz merekesi aıasynda «DAMDASTOUR» halyqaralyq gastronomııalyq festıvali ótip jatyr