Tergeý nusqasyna sáıkes, Qazaqstan azamattary E. men J. 2023 jyldyń jeltoqsan aıynda Bishkek qalasynda tórt jergilikti turǵyndy qylmystyq shemaǵa tartyp, olarǵa 100 dollarlyq kýpıýralarmen 70 myń jalǵan AQSh dollaryn ótkizgen, dep jazady Egemen.kz.
Keıin olar bul qarajatty bankter men aıyrbastaý pýnktterinde az mólshermen bólip-bólip, túpnusqa aqshaǵa aıyrbastap otyrǵan. Nátıjesinde jalǵan aqshanyń bir bóligi aınalymǵa engizilgen.
Atalǵan alaıaqtyq áreket quqyq qorǵaý organdarynyń nazarynan tys qalmaǵan. Qylmystyq toptyń barlyq múshesi ustalyp, is sotqa joldandy.
Bishkek qalasynyń Pervomaı aýdandyq sotynyń úkimimen Qazaqstan azamaty E. Qyrǵyz Respýblıkasy Qylmystyq kodeksiniń «Aldyn ala sóz baılasý arqyly adamdar toby jasaǵan, iri kólemdegi aqsha men baǵaly qaǵazdardy qoldan jasaý» baby boıynsha kináli dep tanyldy. Sot oǵan jalpy rejımdegi túzeý kolonııasynda bes jyl merzimge bas bostandyǵynan aıyrý jazasyn taǵaıyndady. Amnıstııaǵa sáıkes, ótelmegen jaza merzimi úshten birge qysqartyldy.
Onyń sybaılasy J. da dál osy bap boıynsha kináli dep tanylyp, bes jylǵa bas bostandyǵynan aıyryldy. Oǵan da amnıstııa negizinde jaza merzimi úshten birge qysqartyldy.
Qylmystyq shemaǵa qatysqan Qyrǵyzstan azamattary qylmysty jasyrý faktisi boıynsha kináli dep tanylyp, árqaısysyna 50 myń som (shamamen 264 myń teńge) kóleminde aıyppul salyndy.
Sonymen qatar, Bishkek qalalyq sotynyń qylmystyq ister jáne quqyqbuzýshylyqtar jónindegi sot alqasy sottalǵan qazaqstandyqtardy jazasyn ótegennen keıin Qyrǵyzstan aýmaǵynan shyǵarý týraly sheshim qabyldady.
Aıyptalýshylar apellıasııalyq shaǵym túsirgenimen, birinshi satydaǵy sot úkimi ózgerissiz qaldyryldy.