Almaty oblysyndaǵy týrıstik baǵyttarda aýqymdy senbilikter ótip jatyr. «Tazalyq kúnderi» ekologııalyq aksııasy aıasynda shatqaldar men sarqyramalardan bastap, kólder men demalys aımaqtaryna deıingi aýmaqtar tazartyldy, dep jazady Egemen.kz.
Bastama mamyr aıyndaǵy merekeler men demalys kúnderi óńirdiń negizgi týrıstik nysandaryn abattandyrýdy kúsheıtýge baǵyttalǵan.
Tazalyq jumystary júrgizilip jatqan baǵyttar qatarynda Esik kóli, Kólsaı kólderi, Sharyn shatqaly, Assy jaılaýy, Pervomaı toǵandary, mýzeıler aýmaǵy, tabıǵı oıyn-saýyq saıabaqtary jáne jyl saıyn myńdaǵan týrıster tamashalaıtyn ózge de nysandar bar.
Búgin «Tazalyq kúnderi» ekologııalyq aksııasy aıasynda 130 kásiporyn men uıym ókilderi, jalpy 20 myńnan astam óńir turǵyny 120 gektardan astam aýmaqty tazartty. Tazalyq jumystary Túrgen shatqalynda, «Tańbaly tas» arheologııalyq kesheninde, «Aq-Bulaq» taý-shańǵy kýrortynda, «Kóshpendiler qalashyǵynda» jáne ózge de tanymal týrıstik oryndarda júrgizildi. Bir kúnniń ishinde 340 tonna turmystyq qaldyq jınalyp, arnaıy polıgondarǵa shyǵaryldy. Jumysqa 22 birlik arnaıy tehnıka jumyldyryldy.
«Týrıstik oryndardyń tazalyǵy – eldiń ımıdji men mádenıetiniń aıqyn kórinisi. Tabıǵattyń sulýlyǵyna tamsanǵan árbir qonaq onyń kútimine de nazar aýdarady. Taza ári uqypty orta týrısterge jaǵymdy áser qaldyryp, qaıta kelýge degen yqylasyn arttyrady. Sondyqtan óńir tazalyǵyn saqtaý – ár azamattyń mindeti. Qarapaıym tazalyq qaǵıdalaryn saqtaý arqyly týǵan jerimizdiń kórkeıýine úles qosa alamyz», dedi oblys ákimi Marat Sultanǵazıev.
Almaty oblysyndaǵy týrıstik baǵyttarda uıymdastyrylǵan «Tazalyq kúnderi» aksııasy aldaǵy demalys kúnderi de jalǵasady. Sanıtarlyq tazalaý jumystary óńirdegi tanymal shatqaldar, kólder men demalys aımaqtaryn qamtıdy. Aksııaǵa oblys turǵyndary men qonaqtary, eriktiler, kásipkerler jáne qoǵamdyq uıym ókilderi qatysa alady. Uıymdastyrýshylar barsha jurtty bastamaǵa qoldaý bildirip, týrıstik oryndardyń tazalyǵyna úlken jaýapkershilikpen qaraýǵa shaqyryp otyr.
Oblys ákimdiginiń málimetinshe, «Tazalyq kúnderin» ótkizý týrıstik aımaqtardyń ekologııalyq jaǵdaıyn jaqsartyp qana qoımaı, turǵyndar men qonaqtardyń boıynda tabıǵatqa degen janashyrlyq sezimin oıatady. Ekologııalyq naýqan «Taza Qazaqstan» respýblıkalyq aksııasy aıasynda júzege asyrylyp jatyr.
Aıta keteıik, 2026 jyly Almaty oblysynda 220 myń túp aǵash otyrǵyzý josparlanǵan. Jyl basynan beri 77 myń kóshet egildi. Kóktem bastalǵaly óńirde 8 iri senbilik uıymdastyrylyp, 4 myń tonnadan astam qoqys shyǵarylǵan. Sonymen qatar kóshet dánegin daıyndaý jumystary da qolǵa alynǵan.