Sýdanda medısınalyq mekemege jasalǵan soqqy saldarynan 64 adam qaza taýyp, taǵy 89 adam jaraqat aldy, dep habarlaıdy Egemen.kz.
Bul týraly senbi kúni Dúnıejúzilik densaýlyq saqtaý uıymy málimdedi. Buǵan deıin BUU-nyń Sýdandaǵy gýmanıtarlyq basqarmasy Shyǵys Darfýrdaǵy aýrýhanaǵa jasalǵan shabýylǵa alańdaýshylyq bildirgen. Aldyn ala málimet boıynsha, qaza tapqandar arasynda balalar da bar.
Sýdandyq «Jedel zańgerler» quqyq qorǵaý tobynyń habarlaýynsha, El-Daeın qalasyndaǵy ýnıversıtettik aýrýhanaǵa soqqyny áskerı dron jasaǵan. Alaıda Dúnıejúzilik densaýlyq saqtaý uıymy shabýyl faktisin rastaǵanymen, oǵan kim jaýapty ekenin naqtylamady. Uıym málimetinshe, shabýyl saldarynan medısınalyq mekeme, qyzmetkerler, naýqastar, dári-dármekter men qoımalar zardap shekken.
El-Daeın qalasy jedel áreket etý kúshteriniń baqylaýynda. Qalaǵa ásker tarapynan jıi shabýyl jasalady, olar eldiń ortalyq aımaqtarynan áskerılendirilgen toptardy yǵystyrýǵa tyrysyp jatyr.
Sýdanda ushaq apatynan 18 adam qaza tapty
Sarapshylardyń aıtýynsha, Sýdandaǵy soǵysta drondyq soqqylar keńinen qoldanylyp keledi. BUU dereginshe, qaqtyǵys bastalǵaly medısınalyq mekemelerge jasalǵan shabýyldardan 1800-den astam adam, onyń ishinde 173 medısına qyzmetkeri qaza tapqan.
Jalpy, Sýdandaǵy soǵys ondaǵan myń adamnyń ómirin jalmap, 11 mıllıonnan astam adamdy baspanasyn tastap ketýge májbúr etti. BUU baǵalaýynsha, elde 33 mıllıonnan astam adam gýmanıtarlyq kómekke muqtaj.