Almatyda akter Asqar Jumabek usaq buzaqylyq jasaǵany úshin jaýapkershilikke tartylyp, sot sheshimimen 10 táýlikke qamaýǵa alyndy, dep habarlaıdy Egemen.kz.
Polısııa atalǵan iske baılanysty tekserý júrgizip, ákimshilik shara qoldandy.
Quqyq qorǵaý organdarynyń málimetinshe, er adamnyń agressıvti áreketi beınelengen vıdeoǵa baılanysty Almaty qalalyq polısııa departamenti Medeý aýdandyq polısııa basqarmasy tekserý júrgizgen. Oqıǵaǵa qatysýshylardyń barlyǵy anyqtalyp, kúdikti polısııa bólimine jetkizilgen.
«Azamat A.-ǵa qatysty usaq buzaqylyq faktisi boıynsha ákimshilik is qozǵaldy. Onyń qyzdy qorqytyp, balaǵat sózder aıtyp, ashyq agressııa men qurmetsizdik tanytqany anyqtaldy. Is materıaldary sotqa joldanyp, sot sheshimimen quqyq buzýshy 10 táýlikke qamaýǵa alyndy», dep habarlady vedomstvonyń baspasóz qyzmeti.
Polısııa ókilderi qoǵamdyq tártipti buzý, agressııa kórsetý jáne aınaladaǵy adamdarǵa qurmetsizdik tanytý áreketterine zań aıasynda tıisti baǵa beriletinin atap ótti.
Aıta keteıik, Asqar Jumabek túsirilimge bastalýyna birneshe mınýt qalǵanda kelgen. Alaıda qyzdyń aıtýynsha, ol birden erte qońyraý shalǵany úshin narazylyq bildire bastaǵan. Janjal tez arada agressııaǵa ulasqan.
«Ol saǵat 9:55-te kelip, meni «tym erte» oıattyń, qońyraý shaldyń dep birden ashýly túrde kiná taǵa bastady. Men «Bastamańyzshy, Asqar, uıyqtap qalyp qoıa ma dep qoryqtym, birinshi ret emes qoı» dep jaýap berdim. Osy sózim ony qatty ashýlandyrdy, sózden sóz shyǵyp, jaǵdaı fızıkalyq kúsh kórsetýge deıin jetti. Bul adamnyń iskerlik etıkasy joq, komandadaǵy kez kelgen adam onyń ashýlanshaqtyǵyn, orynsyz reaksııalaryn, aıqaıyn, esik tarsyldatýyn jáne boǵaýyz sózderin rastaı alady. Meni qorǵaıtyn er azamattar bolmady. Maǵan shynymen qorqynyshty boldy», dep jazdy qyz áleýmettik jelide.
О́z kezeginde akter de únsiz qalmaı, áleýmettik jelidegi paraqshasynda bolǵan jaǵdaıǵa qatysty pikir bildirdi.
Onyń aıtýynsha, ol agressıvti áreketi úshin qyzdan keshirim suraǵan jáne shynymen de «ashýǵa berilgenin» moıyndaǵan. Sondaı-aq ol qyzǵa shabýyl jasaýdy kózdemegenin, tek ashý ústinde zattary bar chemodandy teýip jibergenin atap ótti.