«Eger maǵan han taǵyn usynsa, men oǵan eshqashanda ustazdyq jolymdy aıyrbastamas edim» deýshi edi ustaz.
KSRO Memlekettik syılyǵynyń laýreaty, «Dáýirdiń dara ustazy» atanǵan Qanıpa Bitibaevanyń 75 jyldyǵyna oraı «Ustazdarǵa ustaz bolǵan – asyl jan» atty aptalyq ótti. Qazirgi eldegi jaǵdaıǵa baılanysty qashyqtan uıymdastyrylǵan aptalyqtyń ótýine oblystyq Bilim basqarmasynyń basshysy Saırangúl Jumadilova qoldaý kórsetti. Oraıy kelgende aıta keteıik, búgin uly ustazdyń týǵan kúni.
Jeti kúnge josparlanǵan is-shara aıasynda Abaı men Muhtardy dáriptegen ulaǵatty ustaz jaıly beınerolıkter kórsetildi. Sondaı-aq respýblıkalyq qazaq tili men ádebıetinen ótkiziletin pándik olımpıadanyń ánuranyna aınalǵan «Sarqylmaıtyn saǵynyshym – Han apa» atty án naqyshyna keltire shyrqaldy.
Aptalyq barysynda kózi tirisinde-aq aty ańyzǵa aınalǵan Qanıpa Bitibaevanyń áriptesteri men shákirtteri respýblıkanyń túkpir-túkpirinen júrekjardy lebizderin beınerolık arqyly joldady. Sonyń ishinde ulaǵatty ustazdyń atyna tuńǵysh ret oqý grantyn bólgen S.Amanjolov atyndaǵy ShQMÝ-dyń rektory Muhtar Tólegenniń qazaqtyń Han apasyna arnaǵan jyly lebizi qatysýshylardyń júregin eljiretti. Budan soń Shyǵys Qazaqstan gýmanıtarlyq kolledjiniń dırektory Farhad Qurmanov sóz alyp, kórnekti ustaz týraly lebizin jetkizdi. «Ulaǵatty ustazym Qanıpa Omarǵalıqyzy meniń adam retinde qalyptasýyma jáne ǵylym jolyna bet burýyma úlken eńbek sińirdi. Meniń ekinshi anamdaı boldy. Sonaý 1987 jyldan maǵan qazaq tili men ádebıeti páninen sabaq berdi. Sonda Han apamyz bizge «Kim bolamyn?» degen taqyrypta shyǵarma jazdyrdy. Ol kezde bárimiz basqa mamandyq ıesi bolamyz dep oıymyzdy bildirdik. Alaıda ýaqyt óte kele Qanıpa Bitibaeva bizdi ádebıet nárimen sýsyndatty. Biz onyń sabaqtaryna asqan qyzyǵýshylyqpen daıyndaldyq. 11 synypty bitirgende 25 oqýshynyń 20-sy qazaq tili men ádebıeti páni muǵalimi mamandyǵyna oqýǵa tústi. Men Qanıpa apaıdyń avtorlyq synybynyń alǵashqy túlegimin. Ustazym meniń ýnıversıtet qabyrǵasyndaǵy alǵashqy ǵylymı jetekshim boldy. Abaı men Muhtardy zertteýge baǵyt-baǵdar berdi. Ustaz beınesi bizdiń máńgi júregimizde saqtalady» deıdi S.Amanjolov atyndaǵy ShQMÝ-dyń professory, abaıtanýshy Aıjan Qartaeva.
Aptalyq kezinde Jambyl atyndaǵy mamandandyrylǵan mektep-gımnazııa-ınternatynyń 7-11 synyptar arasyndaǵy tárbıe jetekshileriniń bastaýymen Qanıpa Omarǵalıqyzyna arnalǵan chellendj uıymdastyryldy. Oǵan Gúlnár Omarbaeva, Qarlyǵash Saǵıdolldına, Baıan Qyryqbaeva, Jámıla Ahmetova, Kenjegúl Eleýsizova, Indıra Álimhanqyzy, Ánııa Raısova syndy birqatar qyzmetkerler qatysty. «Bıylǵy jyldyń ereksheligi sol, uly aqyn Abaı Qunanbaıulynyń 175 jyldyq mereıtoıy men KSRO Memlekettik syılyǵynyń laýreaty Qanıpa Omarǵalıqyzynyń 75 jyldyǵy tuspa-tus kelip otyr. Apaı ustazdyqty ulyqtaǵan erekshe tulǵa edi. Onyń bul saladaǵy sińirgen eńbegi zor» deıdi pedagogıka ǵylymdarynyń doktory, professor Faýzııa Oralbaeva.
Aptalyq barysynda «Maqtansań, Qanıpam dep qazaq maqtan» ataýymen Qanıpa Bitibaevanyń respýblıkalyq ǵylymı-ádistemelik zerthanasynyń jumysy ustazdar qaýymynyń nazaryna onlaın rejımde usynyldy. Osy maqsatta 60-qa tarta beınerolık túsirildi. «Qanıpa Bitibaeva esimi altyn áriptermen jazylatyn uly tulǵa. Men úshin tek qana qazaq tili men ádebıetiniń muǵalimi ǵana emes, jalpy qazaq ustazynyń sımvoly, etalony der edim. Onyń bir aýyz sózi meniń oǵan degen qurmetimdi arttyrdy. Han apa aıtýshy edi: «Eger maǵan han taǵyn usynsa, men oǵan eshqashanda ustazdyq jolymdy aıyrbastamas edim» dep. Osy arqyly ol bizdiń boıymyzǵa adaldyqty sińirdi deıdi halyqaralyq ulttyq IýNESKO klýbtary federasııasy klýbynyń vıse-prezıdenti Ǵanı Beısenbaev.
Shyǵys Qazaqstan oblysy