Soltústik Qazaqstannyń avtojoldary elimizdiń basqa óńirlerindegi sııaqty eshqashan joǵary talap deńgeıinen tabylǵan emes. Jyl saıyn bálen mıllıardtaǵan aqsha bólinse de bıyl istelgen jol kóp bolsa 2-3 jylǵa ǵana shydap, qaıta jóndeýdi talap etip jatady. Jańadan salynǵan jáne jóndelgen joldyń sapasy qatań tekserilmeıdi, sonyń nátıjesinde joldyń jyry eshqashan bitpeıdi. Osy máseleni memlekettik deńgeıde qolǵa alyp, táýelsiz komıssııanyń monıtorıngine beretin kez jetti. Sol komıssııany ustaýǵa ketetin shyǵyn ózin 10-15 ese aqtar edi. О́ıtkeni, joldardyń sapasy jaqsaryp, jóndeý jumystaryna ketetin artyq shyǵyndar azaıar edi.
Soltústik Qazaqstan oblysynda byltyr jol shyǵyndaryna 30 mlrd teńge bólingen. Biraq barlyq joldyń áli de 35 paıyzy jóndeýdi talap etedi. Bıyl taǵy 39 mlrd teńge bólinbek, ol da jol máselesin tolyq sheshe almaıdy. Oblysta barlyǵy 9 myń shaqyrym avtojoldar bar. Jýyrda avtojoldar basqarmasy bastyǵynyń orynbasary T.Áýelov bıyl sonyń 770 shaqyrymyna asfalt tóseletinin jetkizdi. Bul jumystarǵa jaz boıy 1500-deı adam tartylady eken. Árıne, halyqqa jumys tabylǵany jaqsy, biraq bir istelgen joldardy tym bolmasa 10 jylǵa deıin qozǵamaıtyn qylyp, sapaly isteýge ýáde beremiz degen sózder bastyqtyń aýzynan shyqqan joq. О́ıtkeni, joldyń sapaly jasalatynyna mamandardyń ózderi de senbeıdi.
Bıylǵy jóndeletin joldar Tımırıazev, Ýálıhanov jáne Músirepov aýdandarynyń turǵyndaryn qýantpaq. Áıtpese, jaman joldan bul aýdan turǵyndarynyń júıkesi ábden juqarǵan edi. Sondaı-aq «Saýmalkol-Novoıshım» jáne «Pokrovka-Korneevka-Gornoe» tasjoldary jóndelmekshi. «Petropavlovsk — Qorǵan» avtotrassasy da jóndeýden ótpek.
Jol jóndeýdiń qaýyrt shaǵyna jolshylar mamyr aıynan bastap kirisedi.
Soltústik Qazaqstan oblysy