Bul týraly QR Qarýly kúshteri Bas shtabynyń uıymdastyrý, jumyldyrý jumystary departamentiniń basshysy Sáken Júsipov habarlady.
«Áskerı qyzmet jáne qyzmetshilerdiń mártebesi týraly QR zańyna sáıkes Qarýly kúshterdiń jaýyngerlik ázirligin qoldaý maqsatynda Tótenshe jaǵdaı kezinde 2019 jyldyń kókteminde áskerge shaqyrylǵan merzimdi qyzmettegi áskerı qyzmetshilerdi zapasqa shyǵarý ýaqytsha toqtatyldy. Zapasqa shyǵarylǵanǵa deıin osy áskerı qyzmetshilerdi kıim-keshekpen, azyq-túlikpen, qarjy jáne medısınalyq qamtamasyz etý tártibi saqtalady. Sonymen qatar, barlyq óńirde áskerı shaqyrý jáne medısınalyq komıssııalardyń jumystary toqtatyldy. Osyǵan baılanysty Memleket basshysy azamattardy merzimdi áskerı qyzmetke shaqyrý merzimderin 2020 jylǵy maýsymnan tamyzǵa aýystyrý týraly Jarlyqqa qol qoıdy. Jarlyqta azamattardy áskerge shaqyrýdyń budan buryn bekitilgen merzimin aǵymdaǵy jyldyń maýsymynan tamyzǵa deıin uzartý kózdeledi», - dedi S. Júsipov.
Onyń aıtýynsha, azamattardy áskerge shaqyrý TJ rejımi alynǵannan keıin qaıta júrgiziledi jáne 31 tamyzǵa deıin uzartylady. 2019 jyly kóktemde áskerge shaqyrylǵan áskerı qyzmetshilerdi zapasqa shyǵarý TJ rejımi alynǵan jaǵdaıda aǵymdaǵy jyldyń 30 maýsymyna deıin júrgiziledi.
«Elimizde TJ engizgen sátten bastap, Qarýly kúshter ártúrli mindetterdi belsene atqarýda. Búgingi tańda 9500 áskerı qyzmetshi patrýldeýdi, dezınfeksııalaýdy jáne basqa da mindetterdi iske asyrýda. Áskerı qyzmettiń belgilengen merzimin ótkergen, merzimdi qyzmet áskerı qyzmetshilerin zapasqa shyǵarýdy toqtata turý jáne azamattardy áskerge shaqyrý merzimin aýystyrý týraly sheshim bizdiń memleketimizdiń tarıhynda alǵash ret qabyldanyp otyr. Azamattarymyzdyń qaýipsizdigin qamtamasyz etýge baǵyttalǵan. Oryn alǵan jaǵdaıǵa túsinistikpen qaraýdy suraımyz», - dedi Sáken Júsipov.