Aýylda da ómir bar. О́mir bolǵanda qandaı! Qıyndyǵy, qyzyǵy, qyzýy mol, qaınaǵan ómir. Aýylda turyp ta bıznesti óristetýge, qyzmette ósýge bolady. Mine, muny naqty iste dáleldeýmen júrgen qyz-kelinshekterimiz qatarynyń jyldan-jylǵa kóbeıip kele jatqany qýantady. Kamenka aýylyna kelin bolyp túskenine shırek ǵasyrdan astam ýaqyt ótken kásipker kelinshek, qoǵam belsendisi Elmıra Myrzageldıeva osynaý shoǵyrdan oıyp oryn alǵan.
Túptiń túbinde taǵdyrynyń túbegeıli ózgeretini, aýyl adamdarymen etene tirlik keshetini Tarazda týyp-ósip, sondaǵy №47 orta mektepti támamdaǵan qala qyzynyń oıy túgili túsine de kirmegen. Alaıda ol ózi kelin bolyp túsken áýletke tez sińisip ketti. Búginde qazaqy salt-dástúrge bir kisideı jetik, aýyl-aımaqqa syıly kelin, eki balanyń qamqor anasy, týǵan eliniń naǵyz patrıoty, isker áıel. Aýylda tikken týyn bıikte jelbiretip keledi. Bul aýylda týǵanmen, qalaǵa ketýge búıregi buryp turatyn qaısybir qarakózderimiz úshin úlgi-ónege ári olardyń namys-jigerin janıtyn erlikpen para-par is demeı kórińiz.
Onyń qazir de aýyldan irgesin qozǵaltqysy joq. «Aýyl – qazaqtyń altyn tamyry ǵoı. Onyń gúldenip, kórkeıýine hal-qaderimizshe úles qosa beretin bolamyn», deıdi E.Myrzageldıeva aǵynan jarylyp. Táýelsizdikke qol jetkizgeli beri elimizde shaǵyn jáne orta kásipkerlik isin damytýǵa aıryqsha qoldaý kórsetilip keledi. Mine, osy memlekettik qoldaýlardyń baqýattylyqqa bastaıtynyn jaqsy uǵynǵan Elmıra Álenqyzy bıznesin 2000 jyly kúıeýi Ǵabıden ekeýi úı aýlasyna qazaqy úı tigip, qymyzhana ashýdan bastapty. Bulardyń ádemi baptalǵan bal qymyzynan kimder dám tatpady deseńizshi! Bıeni saýyp, qymyzdy babyna keltiretin de Elmıranyń ózi. Bertinde ol jekemenshik tamaqtandyrý ornyn ashty. E.Myrzageldıevanyń úlken joldyń boıynda ornalasqan «Dıana» dámhanasy kelýshilerine minsiz qyzmet kórsetýde. Munda bes-alty aýyl azamaty jumyspen qamtylyp otyr. Kásipker kelinshek aýdan ortalyǵyndaǵy úlken bir meıramhananyń ákimshisi qyzmetin qosa atqarady.
Ol aýdan men oblys kóleminde ótkizilip jatatyn qoǵamdyq jáne qaıyrymdylyq is-sharalardyń barlyǵyna derlik belsendi atsalysady. Sondaı-aq óziniń kásibı hám saıası bilimi men biliktiligin udaıy jetildirip otyrýdy da áste umytpaıdy. 2015 jyly Nazarbaev Ýnıversıtette «Joǵary menedjmenttik basshylyq» baǵdarlamasy boıynsha bilim alyp, EQYU-nyń semınar-trenınginde, komanda qurý jáne kóshbasshylyq etý, «Damý-Bıznes», «Bıznes-keńesshi», «Bıznes-Bastaý» baǵdarlamalary aıasynda arnaıy kýrstarda biliktiligin jetildirgen.
Búginde óńirdi kógaldandyrý jumystaryna, sondaı-aq «jasyl ekonomıkanyń» damýyna ózindik úlesin qosýda. 2015 jyldan beri «Atameken» UKP janyndaǵy Isker áıelder keńesi aýdandyq fılıalynyń tóraǵasy, Qazaqstan halqy Assambleıasy janyndaǵy Analar keńesi basqarmasynyń, Nur Otan partııasynyń múshesi, «Atameken» UKP kásipkerlerdiń quqyǵyn qorǵaý komıssııasy jumys tobynyń múshesi retinde aýqymdy jumystardy júzege asyrýmen keledi. Onyń aıtýynsha, eldiń damýy men ekonomıkasyndaǵy jańǵyrýlarǵa, jalpy halyqtyń básekege qabilettiligin arttyrýǵa atsalysýmen qatar, ekonomıkalyq eriktilikti qamtamasyz etý asa mańyzdy. Bul – adamdardyń tabysy men turmys sapasyn kóterýge jáne jaqsartýǵa múmkindik beretin úderis. Baqytty da baqýatty áıel – tabysty memleket atanýymyzdyń da kepili.
2018 jyly «Rýhanı jańǵyrý» baǵdarlamasy aıasynda «Qazaqstannyń 100 jańa esimi» jobasynyń ekinshi kezeńi júzege asyrylǵany belgili. Sarapshylar toby atap ótkendeı, jobaǵa qatysýshylar jeńimpaz atanbasa da, óz salasynyń kásibı sheberi ári elimizdiń aıtýly azamaty bolyp qala bermek. Elmıra Álenqyzy – osynaý jobaǵa qatysýshylardyń biri. Ol úshin ótken jyldar ózge de jetistikterimen este qaldy. Atap aıtqanda, Astanada ótken alǵashqy Aýyl áıelderiniń forýmynda úzdik jetekshi retinde «Atameken» UKP Isker áıelder keńesiniń tóraǵasy Lázzat Ramazanovanyń qolynan Alǵys hat alǵany, sirá, esten keter me?! Oblys ortalyǵynda alǵash uıymdastyrylǵan Halyqaralyq áıelder kásipkerligi forýmyna qatysý mártebesine de ıe boldy. Munyń barlyǵy qarapaıym ǵana aýyl áıeliniń zııaly qaýym ókili, bıznesvýmen retinde qalyptasyp, áriptesterin nátıjeli eńbek pen jappaı kásipkerlikke, berekeli iske jumyldyrý jolynda júzege asyrǵan ilkimdi jumystarynyń jemisi ekeni anyq.
E.Myrzageldıeva jetekshilik etetin aýdandyq isker áıelder keńesiniń músheleri aýdanda ashylǵan «Dýlat baba» kesenesi aýmaǵyn abattandyrý maqsatynda 50 túp jemis aǵashynyń kóshetin otyrǵyzdy. Sondaı-aq respýblıkalyq «Mektepke jol» aksııasy aıasynda turmysy tómen birqatar otbasy balalarynyń kerek-jaraǵyn túgendep, mektep formasyn alyp berýge kómek kórsetken. «Kásipkerlik názik jandylar úshin de jat emes. Qazirdiń ózinde aýdanda onnan astam isker áıel bar. Olar negizinen saýda, qoǵamdyq tamaqtandyrý, meıramhana bıznesi, qyzmet kórsetý salalarynda jumys isteıdi. Biz negizinen aýyl áıelderiniń jeke kásibin ashýy úshin kásipkerlik negizderin oqyp-úırenýine yqpal etemiz. Sheberlik synyptaryn da uıymdastyramyz. Bir jyldyń ózinde «Bastaý-Bıznes» jobasy boıynsha arnaıy oqyǵan 16 áıel ózderiniń bıznes-josparyn sátti qorǵap, tıisinshe jeńildetilgen nesıe alyp, jeke kásip bastady. Aldaǵy ýaqytta da qatarymyz tolyǵa bermek», deıdi Elmıra.
Jalpy, ómir, tirshilik, kásipkerlik – analarǵa da aýyr mindetter júkteýde. E.Myrzageldıeva úshin de taǵdyr synaǵy az bolmapty. Osydan on jyldaı buryn oıda joqta otaǵasynan, eseıip qalǵan tuńǵysh ulynan aıyrylý oǵan aýyr soqqy bolyp tıdi. Jekemenshik ıelikterindegi jıyrma bes jylqynyń bir kúnde qoldy bolyp ketýi de qymyzhana bıznesine edáýir shyǵyn keltirdi. Alaıda munyń barlyǵy qaısar kelinshekti moıyta almady. О́zine, eńbegine sengen eńbekqor jan jasymaı, qasarysa ilgeri umtylýmen keledi. Úlken áýlettiń bas ıesi de ózi. Búginde uly Jalǵas Almatyda, qyzy Dıana TarMÝ-da bilimderin jetildirýde. Dıana da anasy sekildi qaısar, qıyndyqqa shydamdy, maqsatker tulǵa bolyp qalyptasyp, ómir maıdanynda shar bolattaı shyńdalýdan ótýdi oılaǵan bolar, atalǵan oqý ornynyń áskerı kafedrasynda qosymsha oqýdy tańdaǵan eken. Elmıra kúni erteń uly – áke, qyzy – ana ornyn basyp, aýyl sharýashylyǵy áleýetin arttyrýǵa ózindik úlesterin qosatynyna nyq senimdi.
Baımahanbet AHMET,
jýrnalıst
Jambyl oblysy,
T.Rysqulov aýdany