Prezıdent janyndaǵy Ortalyq kommýnıkasııalar qyzmetinde ótken baspasóz máslıhatynda Eńbek jáne halyqty áleýmettik qorǵaý vıse-mınıstri Erlan Áýkenov Uly Otan soǵysynyń qatysýshylary men múgedekterine kórsetiletin kómek týraly málim etti.
Vıse-mınıstr aldymen soǵys kezinde maıdanǵa 1 mln 200 myńnan astam qazaqstandyq shaqyrylǵanyn, 20-dan astam atqyshtar dıvızııasy men basqa da quramalar qurylǵanyn aıtty. Jaýyngerlik erlikteri úshin myńdaǵan qazaqstandyqtar medaldarmen jáne ordendermen marapattalyp, 500-ge jýyq adam Keńes Odaǵynyń Batyry atandy. Tórt qazaqstandyq eki márte batyr atanyp, 110 qazaqstandyq úsh dárejeli «Dańq» ordenimen marapattalǵan. Bıyl 1 mamyrdaǵy jaǵdaı boıynsha Qazaqstanda 1025 UOS qatysýshylary men múgedekteri jáne 123 217 UOS kezinde Jeńiske úles qosqan basqa sanattaǵy azamattar turady.
«О́z eliniń ótkenin bilý jáne qurmetteý, keleshek urpaqtyń jarqyn bolashaǵy úshin Jeńisti jaqyndatý jolynda maıdanda soǵysqan jáne tylda eńbek etken ardagerlerimizdiń erlikterin umytpaý – árbir adamnyń paryzy. 75 jyldyqta ardagerlerge qamqorlyq kórsetý, olardyń ómir súrý sapasyn arttyrý memlekettiń áleýmettik saıasatynyń basty basymdyqtarynyń biri», dedi Erlan Áýkenov.
Máselen, zeınetaqy jáne ózge de áleýmettik tólemderdiń mólsheri jyl saıyn ulǵaıýda. 2020 jyldyń 1 qańtarynan bastap tólem mólsheri bazalyq zeınetaqy boıynsha 5%-ǵa, yntymaqty zeınetaqy boıynsha 7%-ǵa ósken. Aǵymdaǵy jylǵy 1 sáýirden bastap Memleket basshysynyń tapsyrmasy boıynsha tólemderdiń mólsheri taǵy 5%-ǵa ındekstelip, nátıjesinde 2020 jylǵy 1 mamyrdaǵy jaǵdaı boıynsha alynatyn áleýmettik tólemderdiń ortasha jıyntyq mólsheri UOS qatysýshylaryna – 164 542 teńgeni, UOS múgedekterine – 169 762 teńgeni, UOS qatysýshylaryna teńestirilgen adamdarǵa – 156 000 teńgeni, UOS múgedekterine teńestirilgen adamdarǵa – 109 427 teńgeni, UOS jyldaryndaǵy tyl eńbekkerlerine 107 577 teńgeni qurady.
«Sonymen qatar ardagerlerge áleýmettik qoldaýdyń qosymsha sharalary kórsetiledi. Olardyń barlyǵy áskerı qyzmetshiler úshin qoldanylatyn quqyqtar men kepildikterge ıe. Jeńildikpen turǵyn úı alady, salyq salý boıynsha jeńildikteri bar, medısınalyq qyzmet kórsetý jáne sanatorlyq-kýrorttyq emdelýden tegin ótedi. Sondaı-aq jergilikti atqarýshy organdar bıýdjettik jáne demeýshilik qarajat esebinen ardagerlerge ómirlik qıyn jaǵdaıda nemese mereke (ataýly) kúnderi materıaldyq kómek, turǵyn úıdi jóndeý, otynmen qamtamasyz etý, kommýnaldyq qyzmetterdi tóleý jáne qoǵamdyq kólikte jol júrý boıynsha jeńildikter túrinde qosymsha áleýmettik qoldaý túrlerin kórsetedi», dep tolyqtyrdy vıse-mınıstr.
Jyl saıyn birjolǵy materıaldyq kómek tóleý dástúrge aınaldy. Jeńistiń 75 jyldyǵyna oraı jergilikti bıýdjetterde osy maqsatqa 7,6 mlrd teńge qarastyrylǵan.
Jalpy, azamattardyń kelesi sanattaryna jatatyn 124 242 adam úshin birjolǵy tólemder qarastyrylǵan. Olar: UOS qatysýshylary men múgedekteri (1025 adam), Qorshaýdaǵy Lenıngrad turǵyndary (87 adam), konslagerlerdiń kámeletke tolmaǵan burynǵy tutqyndary (289 adam), qaıtys bolǵan UOS múgedekteriniń áıelderi (kúıeýleri) (4 866 adam), UOS kezinde qaza bolǵandardyń jesirleri (15 adam), tyl eńbekkerleri (109 040 adam), UOS qatysýshylary men múgedekterine teńestirilgen basqa da adamdar (8 920 adam).
«Eńbek jáne halyqty áleýmettik qorǵaý mınıstrligi óńirler men respýblıkalyq mańyzy bar qalalardyń ákimdikterine UOS-daǵy Jeńiske úles qosqan azamattardyń barlyq sanattary úshin materıaldyq kómektiń eń tómengi kepildi shegin belgileýdi usyndy. Nátıjesinde, UOS qatysýshylary men múgedekterine barlyq óńirlerde 1 mln teńge kóleminde birjolǵy materıaldyq kómek kórsetildi. Qorshaýdaǵy Lenıngrad turǵyndaryna jáne konslagerlerdiń jasy kámeletke tolmaǵan burynǵy tutqyndaryna 50 myń teńgeden kem emes qarjy beriledi. Qaıtys bolǵan UOS múgedekteriniń áıelderine, UOS kezinde qaza tapqan jaýyngerlerdiń jesirlerine jáne UOS jyldaryndaǵy tyl eńbekkerlerine 30 myń teńgeden kem emes birjolǵy materıaldyq kómek beriledi», dedi Erlan Áýkenov.
Respýblıkanyń 7 óńirinde tólemder aıaqtaldy. Olar – Aqtóbe, Atyraý, Shyǵys Qazaqstan, Qaraǵandy, Qyzylorda oblystary men Nur-Sultan, Almaty qalalary. Sonymen qatar Uly Otan soǵysyndaǵy Jeńistiń 75 jyldyǵyn merekeleý aıasynda ardagerlerge «1941-1945 jyldardaǵy Uly Otan soǵysyndaǵy Jeńistiń 75 jyldyǵy» mereıtoılyq medaldary, sondaı-aq dástúrli azyq-túlik sebetteri beriledi.