Oblys aýmaǵynda mamyr aıynyń 25-ine deıin birqatar shekteýler saqtalady. Atap aıtqanda, kórshi aımaqtarmen shekaradaǵy sanıtarlyq blok-beketter jumysyn jalǵastyrady. Turǵyndarǵa qalaaralyq, aýdanaralyq jáne eldi mekender arasynda qatynaýǵa qoıylǵan shekteý kúshinde qalady.
Sporttyq, mádenı is-sharalar ótkizilmeıdi. Azyq-túlik bazarlarynyń jumysy tańǵy saǵat 10.00 men keshki 17.00 arasynda jalǵassa, kıim-keshek, ózge de zattar satatyn dúkender dezınfeksııa jumystaryn kúsheıtilgen rejımde júrgize otyryp, tańǵy 9.00-20.00 aralyǵynda jumys isteıdi. Balabaqshalarda kezekshi toptar óz jumysyn bastaıdy. Alaıda, munda tek aýrýhanadan anyqtamasy bar tárbıeshiler ǵana jumys isteýi tıis. Búldirshinderdiń densaýlyǵyna qatysty anyqtama talap etiledi. Sondaı-aq oblys ákiminiń orynbasary Sáken Qalqamanov onlaın-brıfıngte adam kóp jınalýyna jol berilmeıtin sulýlyq salondary, tigin sehy, aıaq kıim jóndeý oryndary, shashtaraz, tis emdeý, em jasaý oryndary sekildi shaǵyn kásipkerlik nysandary da aldyn-ala jazylý tásilimen jumysyn bastaı alatynyn málimdedi. Bas memlekettik sanıtarııalyq dárigerdiń 2020 jylǵy 10 mamyrdaǵy N17 Qaýlysymen bekitilgen talaptardy atap keltirdi.
Iаǵnı, úıden shyǵýǵa, serýendeýge tek maska taǵyp, ara qashyqtyqty saqtaǵan jaǵdaıda ruqsat etiletinin, otbasylyq merekeler, týǵan kún, toı-jıyn ótkizýge, úsh adamnan artyq toptyń kóshede jáne qoǵamdyq oryndarda jınalýyna salynǵan tyıym kúshinde qalatynyn eskertti. Oblys aýmaǵyna ruqsat qaǵazy bar avtokólikter men azamattar jáne medısınalyq kómek qajet bolǵan turǵyndar ǵana kirip-shyǵa alady.