Búgin Almaty oblysynan jolǵa shyqqan júk kerýeni Túrkistan oblysynyń Maqtaaral aýdanyna keldi. О́ńirge 15 júk kóligine tıelgen 260 tonna gýmanıtarlyq kómekpen birge jetisýlyq aǵaıynnyń topan sý zardabyn shekken ońtústik jurtyna joldaǵan ystyq sálemi de jetti.
Qaıyrym sharasyna bir kisideı jumylǵan Almaty oblysy turǵyndary 120 tonna azyq-túlik, 140 tonna qurylys materıaldaryn jınap bergen eken. Ári bul Jetisýdan jetken kómektiń alǵashqy legi, qoldaý kórsetý júmysy jalǵasýda. Endi birer kúnnen keıin kezekti kerýen jolǵa shyqpaqshy.
Sondaı-aq Jetisýdyń erikti jastary Maqtaaral aýmaǵyndaǵy qalypqa keltirý isine qolǵabys etpek. Osy jolǵy kerýenmen berge 15 volonter ere kelip, aldaǵy 10 boıyna qurylys jumystaryna aralasady.
- Túrkistan oblysy Maqtaaral aýdanynda oryn alǵan apat barsha qazaqstandyqtardyń qabyrǵasyn qaıystyryp, alańdatqany belgili. Osyǵan baılanysty óńirge el bolyp qoldaý kórsetip, memleketimizdiń túkpir-túkpirinen kómek kelip jatyr. Teńizdeı kóńilmen tamshydaı úlesin qosam degen aǵaıynnyń nıetin júrekjardy tilekteri men ár óńirden kelip jatqan júk kólikteri dáleldep jatyr. Bul iske jetisýlyqtar da jumyldy. Mine, kerýendi bastap ońtústikke kelip qaldyq. Jastar jumylyp, qam kóńil adamdarǵa kómek kórsetpek.. Oraza tutqan aǵaıynǵa jetisýlyqtar atynan aýyzashar berdik. 15 volenter apat zardabyn joıýǵa qolǵabys etedi. Bul kerýen Almaty oblysynan kelgen kómektiń basy, izgi shara jalǵasady, - deıdi Almaty oblysynyń Jastar saıasaty basqarmasynyń basshysy Jomart Qaratas.