Kúndelikti tutynatyn taǵamnyń biri – sút. Áıtse de dúken sórelerinde bul baǵyttaǵy otandyq ónim túrleri jıi kezdese bermeıdi. Munyń ózi ózara básekelestikte reseılik, belarýssııalyq jáne ýkraınalyq taýar óndirýshilerge esemizdi jiberip júrgenimizdiń belgisi bolyp júrmesin. Qalaı degende de búgingi kúni otandyq sút ónimderiniń básekege qabylettilik deńgeıin kóterý isi ótkir kúıde turǵany jasyryn emes.
Osy oraıda oblysta sút ónimderiniń kólemin kóterý jáne klasterin qurý úshin 2014-2019 jyldarda «Yrys» baǵdarlamasy sheńberinde jalpy sany 650 basqa arnalǵan on taýarly sút fermasyn qurý kózdelgendi. Alǵa qoıylǵan maqsat oıdaǵydaı júzege asty. Atalǵan ýaqyttyń aralyǵynda 875 basqa arnalǵan 12 ferma qurylyp, bul jóninde belgilengen meje 13,6 paıyzǵa asyra oryndaldy.
-Búgingi kúni atalǵan baǵdarlama boıynsha qarjy ınstıtýttarymen birlese otyryp «Nan», «Bereke», «Esbol» sekildi sharýa qojalyqtarynyń janynan taýarly sút fermalaryn qurý isi qolǵa alyndy. Sonymen birge Mártók aýdanyndaǵy Mılker JShS-da sút ónimderin óndirýge qatysty birneshe kezeń boıynsha júrgizilgen jobalar jasaqtaldy. О́ıtkeni mundaǵy ınvestor óziniń basty qyzmetin sútti mal sharýashylyǵyn jolǵa qoıýǵa baǵyttaǵan bolatyn, - dedi bul jóninde gazet tilshisine Aqtóbe oblystyq aýyl sharýashylyǵy basqarmasynyń basshysy Qusaıyn Sársenbaı.
Taýarly sút fermalaryn qurý isi qunarly ári juǵymdy mal azyǵy keshenin jasaqtaý isimen bir mezgilde júrgizilmese, ánsheıin qur bos sóz kúıinde qalyp qoıatyny anyq. Bul jóninde 1780 gektar sýarmaly jer ıgerildi. Buǵan qosa bıylǵy jyly oblysta quarama jem zaýyty men taǵy ir taýarly sút fermasy qurylysyn bastaý josparlanǵan. Qazirgi kúni buǵan bólingen ınvestısııa kólemi 2 mlr 300 mıllıon teńge kóleminde bolyp otyr.
О́ńirde sút ónimderin óńdep budan ázir ónimder shyǵarý isinde «Aıs» taýarly sút fermasynyń bási bıik tur. 1100 saýyn sıyrǵa arnalǵan irgeli kásiporyndaǵy zamanaýı qural-jabdyqtar álemdik standarttarǵa tolyqtaı sáıkes keledi. Atalǵan jobanyń jyldyq qýaty jylyna 12 myń tonna sút ónimderin óndirýge laıyqtalǵan.
AQTО́BE oblysy