Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly karantın talaptaryn saqtaý úshin jamaǵatpen oqylatyn bes ýaqyt, juma, taraýyq namazdaryna qatysty qoıǵan ýaqytsha shekteýdi óz kúshinde qalǵanyn málimdedi.
«Alla qalasa, osy aptadan bastap jeke qulshylyq jasap, Quran oqytyp, neke qıdyrýǵa nıet bildirgen azamattar úshin meshitterimizdi ashamyz. Bul – elimizdegi barlyq meshittiń esikteri ashylady degen sóz emes. О́ıtkeni árbir oblystaǵy karantındik jaǵdaı deńgeıi ártúrli. Bas sanıtarlyq dárigerdiń karantındik rejimniń kezeńdik talaptaryn saqtaý boıynsha qaýlysyn ustanýdamyz. Sonymen qatar óńirlerdiń koronavırýstyq ınfeksııanyń taralýyna jol bermeý jónindegi jedel shtabtyń qaýlysyna sáıkes jumys júrgizemiz. Osyǵan oraı, oblystaǵy meshitterimizdiń ashylýy sol óńirlerdegi koronavırýstyq ınfeksııanyń taralýyna jol bermeý jónindegi jedel shtabtyń qaýlysyna sáıkes júzege asyrylady. Al karantın talaptaryn saqtaý úshin jamaǵatpen oqylatyn bes ýaqyt, juma, taraýyq namazdaryna qatysty qoıǵan ýaqytsha shekteýdi óz kúshinde qaldyryp otyrmyz. Jamaǵatpen oqylatyn namazdardyń merzimin aldaǵy ýaqytta qosymsha habarlaımyz. Qasıetti kitabymyz Quranda: «Rasynda, qıyndyqpen birge jeńildik bar. Alla senderge jeńildik qalaıdy», delingen. Mine, Allaǵa shúkir, elimizde tótenshe jaǵdaı merzimi aıaqtalyp, halqymyz qalypty ómir tirshiligine aýysa bastady. Alaıda karantın rejiminiń talaptaryn qatań saqtap, saqtyq sharalaryna asa mán berýimiz qajet. Osy rette, myna talaptardy oryndaýǵa shaqyramyn, meshitke kelýshi barsha jamaǵatty medısınalyq maska jáne qolǵap kıip kelýge, antıseptık qurylǵysyn jıi qoldanýǵa, jeke qulshylyq jasaý kezinde bir jarym metr araqashyqtyqty saqtaýǵa, Quran oqıtyn bólmege bir jarym metr araqashyqtyqty saqtaı otyryp, 10 adamnan artyq kirmeýge, neke qıdyratyn bólmege 4 adamnan artyq kirmeýge. Meshit ımamdarynyń keńesine qulaq asyp, meshitke lek-legimen kezekpen kirýge, meshitte 15 mınýttan artyq bolmaýǵa shaqyramyn. Bul meshit aýasyn ár 3 saǵat saıyn taza aýamen almastyryp otyrýǵa múmkindik beredi», dedi Bas múftı.
Sonymen qatar ol Qadir túni mamyr aıynyń 19-nan 20-na qaraǵan túnge sáıkes kelip otyrǵanyn jetkizip, bul túndi úıde qarsy alý qajettigin aıtyp ótti.
«Bıyl qasıetti Ramazan aıynyń karantın jaǵdaıynda ótip jatqanyn ózderińiz kórip otyrsyzdar. Bul jaǵdaı saýapty amaldar men ıgi sharalarǵa kedergi keltirmedi. Meshit tarapynan 100 myńǵa jýyq kómekke muqtaj otbasyna qaıyrymdylyq jasaldy. Aýyzashar asy áli kúnge deıin tegin taratylýda. Saýaptar eselenip jazylatyn berekeli aıda ıgi iske atsalysqan barsha azamatqa aıryqsha alǵysymdy bildiremin. Alla razy bolsyn! «Qaıyrymdylyq jasasań – qaıyryn óziń kóresiń» dep halqymyz aıtqandaı, ıgi amaldyń saýaby eselinip, qaıyryn ózderińiz kórińizder dep tileımin. Biz osynaý ıgi jumystarmen shektelmeı, Maqtaaral aýdanyndaǵy jerlesterimizge ár oblystaǵy meshitterdiń qoldaýymen azyq-túlik tıelgen júk kólikterin jiberdik. Qarjylaı da qoldaý kórsettik. Biz búgin «Zeket» qorynyń uıymdastyrýymen, oblystaǵy meshitterdiń atsalysýymen 10 mıllıon teńge qarjylaı kómekti «Túrkistan korporatıvtik áleýmettik damý qoryna» aýdardyq. Sonymen qatar 30 tonna un jetkizetin bolamyz. Alla qalasa, Maqtaaral aýdanyndaǵy baspanaǵa asa zárý eki otbasyǵa eki úıdiń kiltin tabystaımyz. Tótenshe jaǵdaı kezinde Qazaqstan musylmandary dinı basqarmasynyń qabyldaǵan sheshimine túsinistik tanytyp, orazany oqshaý túrde ótkizip, úıde qulshylyq etip jatqan barshańyzǵa óz atymnan taǵy da alǵysymdy jetkizemin», dedi Naýryzbaı qajy Taǵanuly.