Premer-Mınıstrdiń orynbasary Roman Sklıar Túrkistan oblysyna jasaǵan jumys sapary barysynda sý basý saldarynan zaqymdalǵan turǵyn úılerdi, áleýmettik maqsattaǵy nysandardy qalpyna keltirý jumystarynyń barysyn tekserdi. Bul týraly primeminister.kz habarlady.
Roman Sklıar men Túrkistan oblysynyń ákimi О́mirzaq Shókeev TJ saldaryn joıý jumystarymen tanysyp, Tólebı aýdanynyń aýyl turǵyndarymen kezdesý ótkizdi. Kezdesý barysynda zardap shekken eldi mekenderdiń tynys-tirshiligin tez arada qalpyna keltirý úshin bılik tarapynan qabyldanyp jatqan sharalar týraly aıtyldy. Sondaı-aq, Maqtaaral aýdanyndaǵy sý basqan aýmaqtardy aralap shyqty.
Sapar barysynda Myrzakent kentindegi jeke menshik turǵyn úılerdiń qurylysyn salýǵa bólingen 70 ga jer ýchaskesindegi jańa shaǵyn aýdanda júrgizilip jatqan qurylys jumystary tekserildi. Úkimet rezervinen turǵyn úı salý, ınjenerlik-ınfraqurylymdyq shyǵystardy qamtamasyz etý, sý qubyry jelilerin qaıta jańartý jáne qalpyna keltirý, kólik ınfraqurylymyn qalpyna keltirý úshin qarajat kózdelgen.
Jańa shaǵyn aýdannyń qurylysyna 32 merdigerlik uıym tartylǵan, 313 úıde qurylys jumystary bastaldy. Qurylys alańynda 900-ge jýyq qurylysshy men 70 arnaıy tehnıka qurylys-montajdaý jumystaryn júrgizýde.
Roman Sklıar zaqymdalǵan úılerdi, kólik jáne ınjenerlik ınfraqurylym obektilerin qalpyna keltirý, sý basqan aýmaqtardan sýdy sorý jumystarynyń qarqynyn tómendetpeýdi tapsyrdy.