Bul týraly Fılologııa ǵylymdarynyń doktory, professor Aıgúl Isimaqova «Egemen Qazaqstan» gazetiniń uıymdastyrýymen ótken qýǵyn-súrgin jáne asharshylyq qurbandaryn eske alý kúnine arnalǵan «Ǵasyr zulmaty» atty onlaın dóńgelek ústelinde aıtty.
«Asharshylyq pen saıası qýǵyn-súrgin qurbandaryn eske alý kúnin eki bólek belgileý kerek. Jastarǵa túsindirý, nasıhat júrgizý maqsatynda Nur-Sultan men Almaty qalalarynda asharshylyq qurbandaryna arnalǵan arnaıy oryndar bolýy kerek. Alashorda – tuńǵysh saıası elıtamyz. Qoldary baılaýly zamanda-aq Lenın bastaǵan Sovet úkimetine Ahmet Baıtursynuly, Álıhan Bókeıhanov, Álimhan Ermekovter bastap barǵan komıssııa shekaramyzdy bekitkenine bıyl tamyzda 100 jyl tolady. Osy syndy ult tarıhy úshin mańyzdy oqıǵalardy eske alyp, máselelerdi «Egemen Qazaqstan» gazetiniń kóterip otyrǵany quptarlyq», - dedi Aıgúl Isimaqova.
Onyń aıtýynsha, dál qazirgi kezde bizge kimniń ústinen kimniń qandaı hat jazǵany emes, ár qazaqtyń Otanǵa qandaı eńbek sińirgeni, sińire alatyny mańyzdy. Alashorda týraly aıtqanda da tek ótken shaqta aıtamyz. Olardyń búginmen baılanysy joq. «Alash» degenimiz – Otanǵa qyzmet. Sondyqtan ulttyq kodtarymyzdy da Alashpen baılanystyrýymyz kerek.
«Qazir ǵalymdarymyz eńbekterine qoldaý kútedi. Al arystarymyz abaqtyda jatyp-aq eńbekterin jazdy. Máselen, Maǵjan Jumabaev aıdaýda júrse de qazaq pedagogıkasyna eleýli eńbek sińirdi. Búgingi ǵalymdarǵa otanshyldyq jetpeıtin sekildi. Halel Dosmuhamedov óziniń «Alaman» atty maqalasynda qazaqtyń bólinetini týraly jazǵan. Onyń aıtýynsha, jik jaqsy dúnıe emes. Al otanǵa qyzmet etý alashtyqtardyń basty mindeti edi. Asharshylyqtyń qoldan jasalǵany, Goloshekınniń jospary bolǵany belgili. Jastarǵa dál osy turǵysynan aıtyp, jetkizýimiz kerek. Sondyqtan saıası qýǵyn-súrgin qurbandaryn eske alý kúnin bólek belgileý qajettiligi bary anyq», - dedi fılologııa ǵylymdarynyń doktory, professor.