eSalyq mobıldi qosymshasyndaǵy «Salyq ámııany» qyzmeti salyqty jyldam ári tıimdi toltyrýǵa septesip, birqatar máseleni sheshýge septesti. Bul týraly Prezıdent janyndaǵy ortalyq kommýnıkasııalar qyzmetinde ótken baspasóz máslıhatynda Memlekettik kirister komıteti tóraǵasynyń orynbasary Talǵat Mamaev jáne atalǵan vedomstvonyń Memlekettik qyzmetter departamenti derbes shottardy ákimshilendirý jáne tólemderdi esepke alý basqarmasynyń basshysy Dınara Kúshibaeva aıtyp berdi.
Talǵat Mamaevtyń aıtýynsha, jańa qyzmet qate tólemder men negizsiz aıyppuldardy joıyp qana qoımaı qaıtarymdar jáne ınkassalyq ókimderdiń sanyn azaıtyp, salyq tóleýshiniń shyǵyndaryn únemdeýmen birge bankterdiń komıssııalyq shyǵyndarynan qutylýǵa septigin tıgizdi. Osylaısha, jeke tulǵalar men kásipkerler «salyq ámııanyn» toltyrý arqyly balama salyq tóleýdiń múmkindigin aldy.
«Ámııandaǵy aqsha avtomatty túrde salyq mindettemeleri paıda bolǵan salyqtarǵa esepteledi. Bıýdjettegi bıylǵy jáne aldaǵy mindettemelerdi salyqtar jáne memlekettik kirister organdary bóliminde tanysý bolady. Sol sekildi múlik salyǵy, jer salyǵy jáne kólik salyǵy boıynsha salyq salý nysandary týraly málimetterdi osy jerden kóre alasyzdar. Budan basqa, ózin-ózi jumyspen qamtyǵan tulǵalar úshin biryńǵaı jıyntyq tólemdi (BJT) tóleýdiń qarapaıym jáne yńǵaıly servısi iske qosyldy. Sondaı-aq osy jyldyń aıaǵynda ýákiletti organdarmen birlesip, salyq salý nysandary týraly málimetterdi túzetý qyzmetin engizý josparlanýda. Onyń negizinde jeke tulǵalarǵa salyq salý nysandary týraly aqparatty jańartý úshin elektrondy ótinish jiberýge múmkindik beriledi», - dedi T.Mamaev.
Komıtettiń ekinshi deńgeıli banktermen birigýiniń nátıjesinde salyq tóleýdiń yńǵaıly jáne qarapaıym qyzmetteri engizildi. Osylaısha, 2018 jyldyń shildesinen bastap, salyq tóleýshilerge salyq jáne áleýmettik tólemder boıynsha bereshekterdi MKK-niń «Salyq tóleýshiler kabıneti» veb-qosymshasynda, vedomstvo portalynyń eSalyq mobıldi nusqasynda jáne ekinshi deńgeıdegi bankterdiń mobıldi qosymshalarynda (Homebank, Kaspi.kz jáne basqalary), sondaı-aq Elektrondy úkimettiń portalynda (egov.kz) qarap, tóleý múmkindigi qarastyrylǵan.
2020 jyldyń 1 qazanyna deıin jeke tulǵalarǵa múlik salyǵy men jer salyǵy boıynsha aldaǵy tólemder jáne kórsetilgen qyzmetter boıynsha aqparat bıyl maýsym aıynda ornalastyrylady dep kútilýde.
Osy oraıda salyqtardy tóleý týraly aqparat ekinshi deńgeıdegi bankterden onlaın rejimde 2 mınýt ishinde kelip túsetinin aıta ketken oryndy. Bul memlekettik qyzmetterdi jyldam kórsetýge, jeke bet esepterden tıisti aqparatty usynýǵa jáne shottardan buǵattardy ýaqytyly alyp tastaýǵa jol ashty dep naqtylady spıkerler.