Mańǵystaý oblysynda bıyl qarjylandyrýdyń barlyq kózderi esebinen 1 071 myń sharshy metr nemese 9500 turǵyn úı salý mindeti tur, - dep habarlady IIDM baspasóz qyzmeti.
Bıylǵy I toqsanda salaǵa 22,4 mlrd. teńge ınvestısııa baǵyttalǵan. Bul - ótken jyldyń sáıkes kezeńimen salystyrǵanda 3% kóp qarajat. Osy kezeńde jalpy aýdany 349,4 myń sharshy metr bolatyn 2422 turǵyn úı paıdalanýǵa berildi. Onyń ishinde – 1594 jeke úı.
Jalpy bıyl «Nurly jer» memlekettik baǵdarlamasy sheńberinde Mańǵystaý oblysynda ınjenerlik-kommýnıkasııalyq ınfraqurylym jáne turǵyn úı qurylysyna 15,1 mlrd. teńgege 19 joba iske asyrylyp, 973 adam jumyspen qamtylady.
Kredıttik jáne jalǵa beriletin 1314 páterdipaıdalanýǵa berý josparlanyp otyr.
Onyń ishinde satyp alý quqyǵynsyz jalǵa beriletin turǵyn úı qurylysyna 5 jobany iske asyrý úshin 2,9 mlrd. teńge qarastyrylǵan. I toqsanda bul maqsatqa 276,5 mln. teńge aýdarylyp, ol tolyqtaı ıgerilgen. Jyl sońyna deıin jalpy aýdany 23,4 myń sharshy metr bolatyn 419 jalǵa beriletin páter paıdalanýǵa beriledi. Halyqtyń az qamtylǵan áleýmettik toptaryna, kóp balaly otbasylarǵa beriletin ol baspanalardyń qurylysyna 402 adam jumysqa tartylady.
Al kredıttik turǵyn úı qurylysyna 4 jobany iske asyrý úshin 9 mlrd. teńge qarastyrylǵan. Oǵan 50,2 myń sharshy metr turǵyn úı nemese 895 páterdi paıdalanýǵa berý josparlanǵan. Ol jobalardy iske asyrý úshin 385 adam jumyspen qamtylady.
Budan basqa, «Nurly jer» memlekettik baǵdarlamasy aıasynda 2%-ben nesıe beriletin «Baqytty otbasy» baǵdarlamasyn júzege asyrýǵa bıyl respýblıkalyq bıýdjetten 163 turǵyn úı qaryzyna 1,6 mlrd. teńge qarastyrylyp otyr.
Oblysta turǵyn úı qurylysy aýdandaryna ınjenerlik-kommýnıkasııalyq ınfraqurylym júrgizýge 10 joba iske asyrylady. Ol maqsatqa 3,2 mlrd. teńge bólinedi. Atalǵan jobalar boıynsha 186 jumys orny ashylady.