Bala kezde Almatyda aqyn kóp dep estıtinbiz. Adamzattyń eń sulýy solar dep oılaýshy edik. Júzinen nury tógilip, asqaqtaı basqan aqyndy kórý bir arman boldy. Kóne kitabyndaǵy óleńderin elige oqyp, ózin óleńinen artyq jaqsy kórdik. Ol jylasa, jyladyq. Jymısa, jymıdyq. Sonda bireý: «Osy aqyndar nege jylaıdy? Aqynǵa ne jetpeıdi?» dese, aqyn janyn túsinbeısiń dep shyryldaımyz. Qaıran, kirshiksiz bala kóńil... Qazir oılasam, aqyndarǵa degen qurmetimiz bala shaqta ǵana pák hám shynaıy bolǵandaı.
Qý ýaqyt ornynda tura ma: keıin aqyny kóp Almatyny da kórdik. Álgi aqtap alǵan jylaýyq aqyndy da kórdik. Bárin-bárin sezip, bildik. Tipti, betpe-bet kelip, ashyq-jarqyn sóılestik. Ásirese Jazýshylar odaǵynda aqyn-jazýshylar kóp júredi. Jasy bar, jasamysy bar – bári. О́zderi «qasıetti» dorbasyn arqalap, ara-tura qolyn sermep áńgime aıtqandy óte-móte jaqsy kóredi. Dińkeń quryp tursa da tyńdaısyń. О́ıtkeni ol aqyn ǵoı.
– Sen meni tanısyń ba?
– Shyramytyp turmyn, aǵa (tanymasań da osylaı sál ótirik aıtasyń).
– Meniń mynadaı kitaptarym bar.
– A-a-a, jón eken.
– Sen óziń jazasyń ba?
– Iá.
– Meni oqyp pa ediń?
– Joq, oqymappyn (bu joly shynyńdy aıtasyń).
– Men týraly jazsań, úlken jańalyq ashasyń.
– Kóremiz ǵoı endi…
– Úıime kelip, qalaı jazatynymdy kórseń, tipti tańǵalasyń.
– A-a-a.
– Mine, mynaý meniń óleń kitabym. О́te qyzyq.
– Jaqsy, oqyrmyn.
– Meni teledıdardan kóp kórsetedi. Umytyp turǵan bolarsyń.
– Bálkim…
– Sen meniń telefonymdy jazyp al. 272 ….
– Jazdyń ba?
– Iá, ıá, jazdym.
– Meniń tarıhym qyzyqtyrsa, habarlas.
– Maqul. Saý bolyńyz! Asyǵyp tur edim…
– Meniń ashylmaǵan syrlarym kóp. О́kinbeısiń.
– Jaqsy, aǵa...
P.S.: Bul birshama jyl buryn bolǵan oqıǵa-tyn. Jany óleńge emes, maqtanǵa tolyp qalǵan álgi aqyn aǵalarymyz qazir tipti kúsheıip alǵan. Baıaǵy kitabyn qushaqtap, árkimge bir ustatatyn jaıdary minez joq. О́ıtkeni ol úlken adamǵa aınalǵan.