Aqtóbede ótken jyldyń qarashasynda bolǵan qandy oqıǵaǵa qatysty qylmystyq is toqtatyldy. Mamandandyrylǵan aýdanaralyq qylmystyq sot kúdiktiniń qaıtys bolýyna baılanysty qylmystyq qýdalaýdy doǵarý týraly qaýly shyǵardy, dep habarlaıdy Egemen.kz.
Aqtóbe oblysynyń mamandandyrylǵan aýdanaralyq qylmystyq soty taratqan málimetke sáıkes, 2025 jylǵy 20 qarashada er adam jubaıymen birge Bogoslov tasjoly boıymen kele jatqan. Jol ústinde erli-zaıyptylardyń arasynda janjal týyndaǵan.
Sotta anyqtalǵandaı, kúdikti kólikti toqtatyp, qolyna asúı pyshaǵyn alyp, artqy oryndyqqa aýysyp otyrǵan. Ol áıelin etpetinen jatqyzyp, sol aıaǵymen arqasynan basyp turyp, moıyn tusyna birneshe ret pyshaq salǵan. Alǵan jaraqattary saldarynan áıel oqıǵa ornynda kóz jumǵan.
Osydan keıin er adam jolaı arqan satyp alyp, óndiristik seh aýmaǵyna barǵan. Qondyrǵynyń ústine shyǵyp, ózine qol salǵan. Marqumdardyń artynda 5 bala qaldy.
Shymkentte jol apatynan keıingi kisi óltirý oqıǵasyna qatysty kúdiktiler ustaldy
Atalǵan derek boıynsha is Qylmystyq kodekstiń 99-baby 1-bóligi («Adam óltirý») boıynsha tirkelgen. Alaıda kúdiktiniń qaıtys bolýyna baılanysty onyń qorǵaýshysy isti toqtatý týraly ótinishhat bergen. Prokýror bul ótinishti qoldaǵan.
Sot Qylmystyq-prosestik kodekstiń 35-babyna sáıkes, kúdiktiniń qaıtys bolýyna baılanysty qylmystyq qýdalaýdy toqtatý jóninde qaýly shyǵardy.
Qaýly ázirge zańdy kúshine engen joq.
Nuraı Serikbaıdyń isi «Asa qatygezdikpen kisi óltirý» babyna ózgertildi